ଦୋଷୀ ସାବ୍ୟସ୍ତ ହୋଇଛନ୍ତି କର୍ଣ୍ଣାଟକର ପୂର୍ବତନ ସାଂସଦ ପ୍ରଜ୍ଜ୍ଵଳ ରେବନ୍ନା

କର୍ଣ୍ଣାଟକ: ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି କର୍ଣ୍ଣାଟକର ପୂର୍ବତନ ସାଂସଦ ପ୍ରଜ୍ଜ୍ଵଳ ରେବନ୍ନା। ବେଙ୍ଗାଳୁରୁ ସ୍ଵତନ୍ତ୍ର ଅଦାଲତ ଅଗଷ୍ଟ ୧ ତାରିଖରେ ପ୍ରଜ୍ଜ୍ଵଳ ରେବନ୍ନାଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ତେବେ ଅଗଷ୍ଟ ୨ ତାରିଖରେ ଦଣ୍ଡ ଘୋଷଣା କରିବେ କୋର୍ଟ। ଅଦାଲତଙ୍କ ରାୟ ଆସିବା ପରେ କାନ୍ଦି ପକାଇଥିଲେ ପ୍ରଜ୍ଜ୍ଵଳ।

ହାସନରେ ରହୁଥିବା ଜଣେ ପୂର୍ବତନ ଘରୋଇ ସହାୟଗ ପ୍ରଜ୍ଜ୍ଵଳ ରେବନ୍ନାଙ୍କ ବିରୋଧରେ ଦୁଷ୍କର୍ମ ଅଭିଯୋଗ ଆଣିଥିଲେ। ତାଙ୍କୁ ଦୁଇ ଥର ଦୁଷ୍କର୍ମ କରିଥିବା ନିଜ ଏଫଆଇଆରରେ ଦର୍ଶାଇ ଥିଲେ ପୀଡ଼ିତା। ଏହି ମାମଲା ଦାଏର ହେବାର ମାତ୍ର ୧୪ ମାସ ମଧ୍ୟରେ ପ୍ରଜ୍ଜ୍ଵଳ ରେବନ୍ନାଙ୍କ ବିରୋଧରେ ନିଷ୍ପତ୍ତି ଶୁଣାଇଛନ୍ତି କୋର୍ଟ।

ପ୍ରଜ୍ୱଳ ଶତାଧିକ ମହିଳାଙ୍କୁ ଯୌନ ଶୋଷଣ କରିବା ସହ ପୀଡ଼ିତା ମହିଳାଙ୍କ ଆପତ୍ତିଜନକ ଭିଡିଓ ରେକର୍ଡ କରି ସେମାନଙ୍କୁ ବ୍ଲାକମେଲ୍ କରୁଥିବା ନେଇ ଗମ୍ବୀର ଅଭିଯୋଗ ହୋଇଥିଲା। ଏଭଳି ପ୍ରାୟ ୩ ହଜାର ଭିଡିଓ ଥିବା ଶହ ଶହ ପେନଡ୍ରାଇଭ ବିଭିନ୍ନ ପବ୍ଲିକ ପ୍ଲେସରୁ ମିଳିବା ପରେ ତାଙ୍କ ଯୌନ କେଳେଙ୍କାରୀର ପର୍ଦାଫାସ ହୋଇଥିଲା।

ତେବେ ପ୍ରଜ୍ୱଳ ରେବନ୍ନାଙ୍କ ବିରୋଧରେ ମୁହଁ ଖୋଲିବାକୁ ଥିଲେ ତାଙ୍କ ଘରର ପୂର୍ବତନ ସହାୟିକା। ୨୦୨୪ ମସିହା ଏପ୍ରିଲ ୨୮ ତାରିଖରେ ପ୍ରଜ୍ୱଳ ରେବନ୍ନାଙ୍କ ବିରୋଧରେ ଦୁଷ୍କର୍ମ ଅଭିଯୋଗ ଆଣି ସେ ଥାନର ଦ୍ଵାରସ୍ଥ ହୋଇଥିଲେ।

ପ୍ରଜ୍ୱଳ ରେବନ୍ନା ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବେଗୌଡ଼ାଙ୍କ ନାତି ତଥା କର୍ଣ୍ଣାଟକର ପୂର୍ବତନ ସାଂସଦ। ଜଣେ ଜନପ୍ରତିନିଧିଙ୍କ ନାଁରେ ସିରିଜ୍ ଯୌନ ଶୋଷଣ ଭଳି ସଙ୍ଗୀନ ଅଭିଯୋଗ ଆସିବା ପରେ ସାରା ଦେଶରେ ରାଜନୈତିକ ଝଡ଼ ସୃଷ୍ଟି ହୋଇଥିଲା।