ପ୍ୟାନ-ଆଧାର ସଂଯୋଗ: ୬୦୦ କୋଟି ଜରିମାନା ଆଦାୟ

ନୂଆଦିଲ୍ଲୀ: ପ୍ୟାନ-ଆଧାର ସଂଯୋଗରେ ବିଳମ୍ବ ହେତୁ ସରକାର ୬୦୦ କୋଟି ଟଙ୍କା ଜରିମାନା ଆଦାୟ କରିଛନ୍ତି। ସୋମବାର ଦିନ ସରକାର ସଂସଦକୁ ସୂଚନା ଦେଇଛନ୍ତି ଯେ ପ୍ରାୟ ୧୧.୪୮ କୋଟି ସ୍ଥାୟୀ ଆକାଉଣ୍ଟ ନମ୍ବର ବାୟୋମେଟ୍ରିକ ସହିତ ଏବେ ବି ଲିଙ୍କ ହୋଇନାହିଁ

କେନ୍ଦ୍ର ଅର୍ଥ ରାଷ୍ଟ୍ର ମନ୍ତ୍ରୀ ପଙ୍କଜ ଚୌଧୁରୀ ଲୋକସଭାରେ ଏକ ଲିଖିତ ଉତ୍ତରରେ କହିଛନ୍ତି ଯେ ଆଧାର ସହ ପ୍ୟାନ ଲିଙ୍କ ହୋଇନଥିବା ସଂଖ୍ୟା ୨୯ ଜାନୁୟାରୀ ୨୦୨୪ ସୁଦ୍ଧା ୧୧.୪୮ କୋଟି ହୋଇଥିବାବେଳେ ଲିଙ୍କ ପାଇଁ ପ୍ରାୟ ୬୦୦ କୋଟିର ଜରିମାନା ମଧ୍ୟ ଆଦାୟ କରାଯାଇଛି | ବାସ୍ତବରେ, ଗତବର୍ଷ ଜୁନ୍ ୩୦ ତାରିଖ ପରେ ପ୍ୟାନ ଏବଂ ଆଧାରକୁ ସଂଯୋଗ କରିନଥିବା ବ୍ୟକ୍ତିଙ୍କ ଠାରୁ ୧୦୦୦ ଟଙ୍କା ଜରିମାନା ବାବଦକୁ ଆଦାୟ କରାଯାଇଥିଲା |

ଆଉ ଜୁଲାଇ ୧, ୨୦୨୩ ରୁ ଜାନୁୟାରୀ ୩୧, ୨୦୨୪ ପର୍ଯ୍ୟନ୍ତ ଆଧାର ସହିତ ପ୍ୟାନକୁ ସଂଯୋଗ କରିନଥିବା ବ୍ୟକ୍ତିଙ୍କ ଠାରୁ ମୋଟ ଜରିମାନା ବାବଦରେ ୬୦୧.୯୭ କୋଟି ଟଙ୍କା ଆଦାୟ କରାଯାଇଛି । ସୂଚନା ଥାଉ କି ଯେ ବାୟୋମେଟ୍ରିକ୍ ଆଧାର ସହିତ ଲିଙ୍କ୍ କରିବାର ଶେଷ ତାରିଖ ଥିଲା ଜୁନ୍ ୩୦, ୨୦୨୩ | ଆୟକର ବିଭାଗ କହିଥିଲା ଯେ ଟିକସଦାତା ନିଜ ପ୍ୟାନ ଆଧାର ସହ ସଂଯୋଗ କରିନଥିବେ ସେମାନଙ୍କ ପ୍ୟାନ ଜୁଲାଇ ୧, ୨୦୨୩ରୁ ନିଷ୍କ୍ରିୟ ହୋଇଯିବ ଏବଂ କୌଣସି ରିଫଣ୍ଡ ଦିଆଯିବ ନାହିଁ। ଆହୁରି ମଧ୍ୟ, ଟିଡ଼ିଏସ ଏବଂ ଟିସିଏସ ଅଧିକ ହାରରେ ସଂଗ୍ରହ କରାଯିବ | ଏହା ବ୍ୟତୀତ, ୧୦୦୦ ଟଙ୍କା ଜରିମାନା ଦେଇ ପ୍ୟାନ ପୁଣି ସକ୍ରିୟ ହୋଇପାରିବ |