ରୂପା ଆମଦାନୀ ଉପରେ ଶନିବାର କଟକଣା ଲାଗୁ
1 min read
ନୂଆଦିଲ୍ଲୀ : କେନ୍ଦ୍ର ସରକାର ରୂପା ଆମଦାନୀ ଉପରେ ଶନିବାର କଟକଣା ଲାଗୁ କରିଛନ୍ତି। କାରଣ ମୂଲ୍ୟବାନ ଧାତବ ଆମଦାନୀକୁ ନିୟନ୍ତ୍ରଣ କରିବା ଏବଂ ଦେଶର ବାହ୍ୟ କ୍ଷେତ୍ର ଉପରେ ଚାପ ହ୍ରାସ କରିବା ପାଇଁ ସରକାର ଏଭଳି ପ୍ରୟାସ ଜାରି ରଖିଛନ୍ତି। ଏକ ବିଜ୍ଞପ୍ତିରେ, ବୈଦେଶିକ ବାଣିଜ୍ୟ ମହାନିର୍ଦ୍ଦେଶାଳୟ କହିଛନ୍ତି ଯେ , ରୁପା ସହିତ ରୂପା ମିଶ୍ରିତ ସୁନା ଏବଂ ପ୍ଲାଟିନମ୍ ପାଇଁ ଆମଦାନୀ ନୀତିକୁ ‘ମୁକ୍ତ’ ପରିବେର୍ତ୍ତ ‘ପ୍ରତିବନ୍ଧିତ’ ପର୍ଯ୍ୟାୟରେ ସାମିଲ କରାଯାଇଛି। ପ୍ରତିବନ୍ଧିତ ବର୍ଗରେ ରଖାଯାଇଥିବା ସାମଗ୍ରୀର ଏବେ ଆମଦାନୀ ପାଇଁ ସରକାରୀ ଲାଇସେନ୍ସ ଆବଶ୍ୟକ ହେବ। ସଂପ୍ରତି କେନ୍ଦ୍ର ସରକାର ମୂଲ୍ୟବାନ ଧାତବ ପଦାର୍ଥର ଆମଦାନୀ ଉପରେ ତୀକ୍ଷ୍ଣ ନଜର ରଖିବା ସହ ନିୟନ୍ତ୍ରଣ ଉପରେ ଗୁରୁତ୍ବ ଦେଉଛନ୍ତି।
ଶୁକ୍ରବାର ସରକାର ଆଗୁଆ ପ୍ରାଧିକରଣ ଯୋଜନା ଅଧୀନରେ ସୁନା ଆମଦାନୀକୁ ୧୦୦ କିଲୋଗ୍ରାମ ପର୍ଯ୍ୟନ୍ତ ଆମଦାନୀ ଭିତରେ ସୀମିତ କରିଛନ୍ତି। ବୈଦେଶିକ ବାଣିଜ୍ୟ ମହାନିର୍ଦ୍ଦେଶାଳୟ (ଡିଜିଏଫ୍ଟି) ବିଜ୍ଞପ୍ତି ମାଧ୍ୟମରେ ରତ୍ନ ଏବଂ ଅଳଙ୍କାର କ୍ଷେତ୍ରରେ ଆମଦାନୀକାରୀଙ୍କ ପାଇଁ କଠୋର ଅନୁପାଳନ ଆବଶ୍ୟକତା ପ୍ରଚଳନ କରିଛନ୍ତି। ସୁନା ଆମଦାନୀ ପାଇଁ ଆଗୁଆ ପ୍ରାଧିକରଣ ଜାରି କରାଯିବ। ସର୍ବାଧିକ ଅନୁମୋଦିତ ପରିମାଣ ସୀମା ୧୦୦ କିଲୋଗ୍ରାମ ରହିବ ବୋଲି ବିଜ୍ଞପ୍ତିରେ କୁହାଯାଇଛି। ଡିଜିଏଫ୍ଟି ପ୍ରଥମ ଥର ଆବେଦନକାରୀଙ୍କ ପାଇଁ ମାନଦଣ୍ଡକୁ ମଧ୍ୟ କଠୋର କରିଛି।
ପ୍ରଥମ ଥର ଆବେଦନକାରୀଙ୍କ ଦ୍ୱାରା ଆଗୁଆ ପ୍ରାଧିକରଣ ପାଇଁ ଆବେଦନ କ୍ଷେତ୍ରରେ, ଉତ୍ପାଦନ ସୁବିଧାର ଅସ୍ତିତ୍ୱ, କ୍ଷମତା ଏବଂ କାର୍ଯ୍ୟକ୍ଷମ ସ୍ଥିତି ଯାଞ୍ଚ ପାଇଁ ଆବେଦନକାରୀଙ୍କ ଉତ୍ପାଦନ ସୁବିଧାର ଏକ ବାଧ୍ୟତାମୂଳକ ଭୌତିକ ଯାଞ୍ଚ ସମ୍ପୃକ୍ତ ଆଞ୍ଚଳିକ କର୍ତ୍ତୃପକ୍ଷ ଦ୍ୱାରା କରାଯିବ ବୋଲି ବିଜ୍ଞପ୍ତିରେ ଉଲ୍ଲେଖ କରାଯାଇଛି। ସରକାର ଭବିଷ୍ୟତର ସୁନା ଆମଦାନୀ ଅନୁମୋଦନ ଗୁଡ଼ିକୁ ରପ୍ତାନି କାର୍ଯ୍ୟଦକ୍ଷତା ଆବଶ୍ୟକତା ସହିତ ଯୋଡ଼ିଛନ୍ତି। ସରକାର ଭବିଷ୍ୟତର ସୁନା ଆମଦାନୀ ଅନୁମୋଦନକୁ ରପ୍ତାନି କାର୍ଯ୍ୟଦକ୍ଷତା ଆବଶ୍ୟକତା ସହିତ ଆହୁରି ଯୋଡ଼ିଛନ୍ତି। ସୁନା ଆମଦାନୀ ପାଇଁ ପରବର୍ତ୍ତୀ ଯେକୌଣସି ଅଗ୍ରିମ ପ୍ରାଧିକରଣ, କେବଳ ପୂର୍ବ ସୁନା ପାଇଁ ଅଗ୍ରିମ ପ୍ରାଧିକରଣ ଅନୁଯାୟୀ ନିର୍ଦ୍ଧାରିତ ରପ୍ତାନି ଦାୟିତ୍ୱର ଅତି କମରେ ୫୦% ପୂରଣ କରିବା ପରେ ଜାରି କରିବା ଲାଗି ବିଚାର କରାଯିବ ବୋଲି ବିଜ୍ଞପ୍ତିରେ ଉଲ୍ଲେଖ କରାଯାଇଛି।
ତଦାରଖକୁ ସୁଦୃଢ଼ କରିବା ପାଇଁ ଅଗ୍ରିମ ପ୍ରାଧିକରଣ ଯୋଜନା ଅଧୀନରେ ଆମଦାନୀକାରୀଙ୍କୁ ଏବେ ଆମଦାନୀ ଏବଂ ରପ୍ତାନି କାର୍ଯ୍ୟକଳାପର ବିବରଣୀ ପ୍ରଦାନ କରି ଏକ ସ୍ୱାଧୀନ ଚାଟାର୍ଡ ଆକାଉଣ୍ଟାଣ୍ଟ ଦ୍ୱାରା ପ୍ରମାଣିତ ପାକ୍ଷିକ କାର୍ଯ୍ୟଦକ୍ଷତା ରିପୋର୍ଟ ଦାଖଲ କରିବାକୁ ହେବ। କେନ୍ଦ୍ର ସରକାର ମଧ୍ୟ ସମ୍ପ୍ରତି ସୁନା ଏବଂ ରୂପା ଉପରେ ଆମଦାନୀ ଶୁଳ୍କ ୬ ପ୍ରତିଶତରୁ ୧୫ ପ୍ରତିଶତକୁ ବୃଦ୍ଧି କରିଛି । ମୂଲ୍ୟବାନ ଧାତବ ଆମଦାନୀ ଉପରେ ୩ ପ୍ରତିଶତ ସମନ୍ୱିତ ସାମଗ୍ରୀ ଏବଂ ସେବା ଟିକସ ଲାଗୁ କରିଛି।
ଅନାବଶ୍ୟକ ଆମଦାନୀକୁ ରୋକିବା ଓ ବିଦେଶୀ ମୁଦ୍ରା ଭଣ୍ଡାର ଉପରେ ଚାପ ହ୍ରାସ କରିବା ପାଇଁ ଏହି ପଦକ୍ଷେପ ଗୁଡ଼ିକ ନିଆଯାଇଛି। ମଧ୍ୟପ୍ରାଚ୍ୟ ଯୁଦ୍ଧ କାରଣରୁ ଅଶୋଧିତ ତୈଳ ମୂଲ୍ୟ ବୃଦ୍ଧି ସହ ଯୋଗାଣ ବ୍ୟବସ୍ଥା ପ୍ରଭାବିତ ହୋଇପଡିଛି। ଏପରିକି ବିଶ୍ୱ ଭୂରାଜନୈତିକ ଅନିଶ୍ଚିତତା ବାହ୍ୟ ସନ୍ତୁଳନକୁ ମଧ୍ୟ ପ୍ରଭାବିତ କରୁଛି। ଡଲାର ତୁଳନାରେ ଟଙ୍କା ଦୁର୍ବଳ ହେଉଥିବାରୁ ଭାରତୀୟ ବିଦେଶୀ ମୁଦ୍ରା ଭଣ୍ଡାରକୁ ସୁଦୃଢ ରଖିବା ଲାଗି ଏଭଳି ପଦକ୍ଷେପ ଗ୍ରହଣ କରାଯାଇଛି। ଯଦିଓ ପରିବହନ ପରିମାଣ ୪.୭୬ ପ୍ରତିଶତ ହ୍ରାସ ପାଇ ୭୨୧.୦୩ ଟନ୍ ହୋଇଛି, ତଥାପି ୨୦୨୫-୨୬ ଆର୍ଥିକ ବର୍ଷରେ ଭାରତର ସୁନା ଆମଦାନୀ ୨୪ ପ୍ରତିଶତରୁ ଅଧିକ ବୃଦ୍ଧି ପାଇ ରେକର୍ଡ ୭୧.୯୮ ବିଲିୟନ ଡଲାରରେ ପହଞ୍ଚିଛି।
