ଗଞ୍ଜାମ ତହସିଲ କାର୍ଯ୍ୟାଳୟରେ କର୍ମଚାରୀ ଅଭାବ ଯୋଗୁ ବିଭିନ୍ନ ସରକାରୀ କାର୍ଯ୍ୟ ବାଧାପ୍ରାପ୍ତ

ଗଞ୍ଜାମ, ୨୪।୮: ଗଞ୍ଜାମ ସହରର ଐତିହାସିକ ପୋତାଗଡ଼ ରାସ୍ତାରେ ଅବସ୍ଥିତ ଗଞ୍ଜାମ ତହସିଲ କାର୍ଯ୍ୟାଳୟରେ କର୍ମଚାରୀ ଅଭାବ ଯୋଗୁ ବିଭିନ୍ନ ସରକାରୀ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ହୋଇଛି। ଏହି ତହସିଲ ଅଧୀନରେ ଗଞ୍ଜାମ ଓ ରମ୍ଭା ଏନ୍‌ଏସି ସମେତ ୧୫ଟି ପଞ୍ଚାୟତର ଅଧିକାଂଶ ରାଜସ୍ୱ ଗ୍ରାମ ରହିଛି।

ସୂଚନା ଅନୁସାରେ, ତହସିଲ କାର୍ଯ୍ୟାଳୟରେ ବର୍ତ୍ତମାନ ବହୁ ପଦବୀ ଖାଲି ପଡ଼ିଛି। ଏପରିକି ଦୁଇଟି ପଦବୀର ଦାୟିତ୍ୱ ଜଣେ କର୍ମଚାରୀଙ୍କୁ ଦିଆଯାଇଥିବା ଜଣାପଡ଼ିଛି। ଗତ ୧୫ ଦିନ ମଧ୍ୟରେ ଏକାଥରକେ ୬ ଜଣ କର୍ମଚାରୀଙ୍କୁ ଅନ୍ୟତ୍ର ବଦଳି କରାଯାଇଥିବା ବେଳେ ପ୍ରତିବଦଳରେ ମାତ୍ର ୪ ଜଣ କର୍ମଚାରୀ ଏଠାରେ ଯୋଗଦେଇଛନ୍ତି। ଏହାସହ ଡେପୁଟେସନରେ ଆସିଥିବା ଜଣେ କର୍ମଚାରୀଙ୍କର ମଧ୍ୟ ବଦଳି ହୋଇଯାଇଛି।

ଫଳରେ ବିଭିନ୍ନ ଡକ୍ୟୁମେଣ୍ଟ, ସାର୍ଟିଫିକେଟ ଓ ରାଜସ୍ୱ ସମ୍ବନ୍ଧୀୟ କାର୍ଯ୍ୟରେ ବିଳମ୍ବ ହେଉଛି। ବିଶେଷକରି ବିଭିନ୍ନ ପ୍ରମାଣପତ୍ର ପାଇଁ ଛାତ୍ରୀଛାତ୍ର ଓ ସାଧାରଣ ଲୋକଙ୍କୁ ବାରମ୍ବାର ତହସିଲ କାର୍ଯ୍ୟାଳୟକୁ ଦୌଡ଼ିବାକୁ ପଡ଼ୁଥିବା ଅଭିଯୋଗ ହୋଇଛି।

ସ୍ଥାନୀୟ ଲୋକଙ୍କ କହିବା ଅନୁସାରେ, ପୂର୍ବରୁ ଦିନେଶ କୁମାର ପ୍ରଧାନ, ସମୀର କୁମାର ପାଢ଼ୀ, ଶତ୍ରୁଜିତ ରାଉଳ, ସୁଧୀର ଗମାଙ୍ଗ ଓ ଟ୍ରେଜେରି ନାଜିର ନଳିନୀ ସାହୁ ପ୍ରମୁଖ ଟିମ୍‌ୱାର୍କ ଭାବେ କାର୍ଯ୍ୟ କରୁଥିଲେ। ଏହାଦ୍ୱାରା ବିଭିନ୍ନ ଡକ୍ୟୁମେଣ୍ଟ ଓ ସାର୍ଟିଫିକେଟ ସମ୍ବନ୍ଧୀୟ କାର୍ଯ୍ୟ ସୁବିଧାରେ ସମ୍ପନ୍ନ ହୋଇପାରୁଥିଲା। ଏବେ କର୍ମଚାରୀ ଅଭାବ ଯୋଗୁ ଏହି କାର୍ଯ୍ୟଗୁଡ଼ିକରେ ବିଳମ୍ବ ହେଉଛି।

ଏନେଇ ଯୁବ ସ୍ୱେଚ୍ଛାସେବୀ ତଥା ଏନ୍‌ଏସି ବିଜେଡି ଯୁବ ସଭାପତି ସୁଧୀର କୁମାର ପାଢ଼ୀ କହିଛନ୍ତି, କିଛି ସ୍ୱାର୍ଥବାଦୀ ନେତା ନିଜ କାମ ସୁରୁଖୁରୁରେ ହୋଇଗଲେ ଅନ୍ୟମାନଙ୍କ ସମସ୍ୟା ପ୍ରତି ଦୃଷ୍ଟି ଦେଉନାହାନ୍ତି। ସେହିପରି ପୂର୍ବତନ ଏନ୍‌ଏସି ଉପାଧ୍ୟକ୍ଷ ନୀଳାଞ୍ଚଳ ବାରିକ କହିଛନ୍ତି ଯେ, ପୂର୍ବରୁ ଏକାଥରକେ ୬ ଜଣ କର୍ମଚାରୀଙ୍କ ବଦଳି ହୋଇନଥିଲା। ବର୍ତ୍ତମାନ ଲୋକେ ଏଭଳି ଦୁର୍ଦ୍ଦଶା ଭୋଗୁଛନ୍ତି।

ଅନ୍ୟପକ୍ଷରେ ତହସିଲଦାର ସୁକାନ୍ତ ଚନ୍ଦ୍ର ମିଶ୍ରଙ୍କୁ ପଚାରିବାରୁ ସେ କହିଛନ୍ତି ଯେ, ତହସିଲରେ ବହୁ ପଦବୀ ଖାଲି ଥିବା ସମ୍ପର୍କରେ ଜିଲାର ଉଚ୍ଚ ପ୍ରଶାସନ ଅବଗତ ଅଛନ୍ତି। ଖୁବ୍‌ଶୀଘ୍ର ଖାଲି ପଦବୀଗୁଡ଼ିକ ପୂରଣ ହେବ ବୋଲି ସେ ସୂଚନା ଦେଇଛନ୍ତି।ତହସିଲରେ ଖାଲିଥିବା ପଦବୀଗୁଡ଼ିକ ତୁରନ୍ତ ପୂରଣ କରିବା ସହ ଲୋକଙ୍କ ଦୈନନ୍ଦିନ କାର୍ଯ୍ୟ ସୁବିଧାରେ ସମ୍ପାଦନ ପାଇଁ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।