ରାଷ୍ଟ୍ରପତି ହେବା ପରେ ଟ୍ରମ୍ପଙ୍କୁ ମିଳିବ ଏସବୁ ସୁବିଧା

ଓ୍ବାଶିଂଟନ୍‌: ଆମେରିକାର ନବର୍ନିବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଜି ଶପଥ ଗ୍ରହଣ କରିବେ। ଶପଥ ଗ୍ରହଣ ସହିତ, ଟ୍ରମ୍ପ ଆମେରିକାର ୪୭ତମ ରାଷ୍ଟ୍ରପତି ହେବେ। ରାଷ୍ଟ୍ରପତି ହେବା ପରେ, ସେ କେବଳ କୋଟି କୋଟି ଟଙ୍କାର ଦରମା ପାଇବେ ତାହା ନାହିଁ, ବରଂ ଏଥିସହ ଅନେକ ଭତ୍ତା ଏବଂ ଅନ୍ୟାନ୍ୟ ସୁବିଧା ମଧ୍ୟ ପାଇବେ।

ଆମେରିକୀୟ ରାଷ୍ଟ୍ରପତି ପ୍ରତିବର୍ଷ $୪,୦୦,୦୦୦ (ପ୍ରାୟ ୩.୪୬ କୋଟି ଟଙ୍କା) ଦରମା ପାଆନ୍ତି। ଏହି ଦରମା ୨୦୦୧ ମସିହାରୁ ସ୍ଥିର ହୋଇଛି ଏବଂ ଏପର୍ଯ୍ୟନ୍ତ ଏଥିରେ କୌଣସି ପରିବର୍ତ୍ତନ କରାଯାଇ ନାହିଁ। ଏହା ବ୍ୟତୀତ, ତାଙ୍କୁ $୧,୬୯,୦୦୦ (ପ୍ରାୟ ୧.୪୬ କୋଟି ଟଙ୍କା) ମୂଲ୍ୟର ଅନ୍ୟାନ୍ୟ ଭତ୍ତା ମଧ୍ୟ ମିଳିବ। ଏହି ଭତ୍ତା ସରକାରୀ ଏବଂ ବ୍ୟକ୍ତିଗତ ଭତ୍ତା ଅନ୍ତର୍ଭୁକ୍ତ। ଆମେରିକୀୟ ରାଷ୍ଟ୍ରପତି ବାର୍ଷିକ $୫୦,୦୦୦ ଖର୍ଚ୍ଚ ଭତ୍ତା ପାଆନ୍ତି।

ଡୋନାଲ୍ଡ ଟ୍ରମ୍ପଙ୍କୁ ଯାତ୍ରା ପାଇଁ ଭତ୍ତା ଭାବରେ $୧୦୦,୦୦ ଏବଂ ମନୋରଞ୍ଜନ ଭତ୍ତା ଭାବରେ $୧୯,୦୦୦ ପ୍ରଦାନ କରାଯିବ। ଏଥିରେ ତାଙ୍କ କର୍ମଚାରୀ ଏବଂ ରୋଷେଇଆଙ୍କ ଦରମା ମଧ୍ୟ ଅନ୍ତର୍ଭୁକ୍ତ। ଏହା ବ୍ୟତୀତ, ସେ ରାଷ୍ଟ୍ରପତି ଭାବରେ ଦାୟିତ୍ୱ ଗ୍ରହଣ କରିବା ମାତ୍ରେ, ତାଙ୍କ ଇଚ୍ଛା ଅନୁସାରେ ହ୍ବାଇଟ ହାଉସର ଭିତର ଡିଜାଇନ କରିବା ପାଇଁ ତାଙ୍କୁ $୧,୦୦,୦୦୦ ମିଳିବ।

ଆମେରିକା ରାଷ୍ଟ୍ରପତିଙ୍କ ସରକାରୀ ବାସଭବନ ହ୍ବାଇଟ ହାଉସ ହେବ, ଯେଉଁଠାରେ ସମସ୍ତ ସୁବିଧା ଉପଲବ୍ଧ। ତାଙ୍କର ଘରୋଇ ଏବଂ ବିଦେଶୀ ଯାତ୍ରା ପାଇଁ, ଟ୍ରମ୍ପ ‘ଏୟାର ଫୋର୍ସ ୱାନ’ ନାମକ ଏକ ସ୍ବତନ୍ତ୍ର ବିମାନ ଏବଂ ‘ମାରାଇନ ୱାନ’ ନାମକ ଏକ ହେଲିକପ୍ଟର ବ୍ୟବହାର କରିବେ। ଆମେରିକାର ରାଷ୍ଟ୍ରପତିଙ୍କୁ ୨୪ ଘଣ୍ଟା ସିକ୍ରେଟ ସୁରକ୍ଷା ପ୍ରଦାନ କରାଯାଏ। ଏହା ସହିତ, ରାଷ୍ଟ୍ରପତି ଏବଂ ତାଙ୍କ ପରିବାର ମାଗଣା ଚିକିତ୍ସା ସୁବିଧା ପାଆନ୍ତି।

‘ଏୟାର ଫୋର୍ସ ୱାନ’ ହେଉଛି ଆମେରିକୀୟ ରାଷ୍ଟ୍ରପତିଙ୍କ ସ୍ବତନ୍ତ୍ର ବିମାନ, ଯାହାକୁ ‘ଫ୍ଲାଇଂ ହ୍ବାଇଟ ହାଉସ’ ମଧ୍ୟ କୁହାଯାଏ। ରାଷ୍ଟ୍ରପତିଙ୍କ କାମ କରିବା ପାଇଁ ସମସ୍ତ ପ୍ରକାରର ସୁବିଧା ଏଥିରେ ଉପଲବ୍ଧ। ଏହି ବିମାନରେ ଏକାଥରେ ୧୦୦ ରୁ ଅଧିକ ଲୋକ ଯାତ୍ରା କରିପାରିବେ। ଏହି ବିମାନଟି ଅତ୍ୟାଧୁନିକ ପ୍ରଯୁକ୍ତିବିଦ୍ୟାରେ ସଜ୍ଜିତ।