ଦିଲ୍ଲୀ-NCRରେ ଶୀତ ଋତୁ ଆରମ୍ଭ ହେବା ସହ ବାୟୁ ପ୍ରଦୂଷଣକୁ ନେଇ ଚିନ୍ତା
1 min read
ନୂଆଦିଲ୍ଲୀ,୨୮।୯: ଦିଲ୍ଲୀ-NCRରେ ଶୀତ ଋତୁ ଆରମ୍ଭ ହେବା ସହ ବାୟୁ ପ୍ରଦୂଷଣକୁ ନେଇ ଚିନ୍ତା ବଢ଼ିଛି । ପ୍ରତିବର୍ଷ ଶୀତଦିନରେ ଦିଲ୍ଲୀ-NCRର ବାୟୁ ଗୁଣବତ୍ତା ଖରାପ ହେଉଥିବାରୁ ଏଥର ମଧ୍ୟ ପ୍ରଦୂଷଣ ନିୟନ୍ତ୍ରଣ ପାଇଁ ଦିଲ୍ଲୀ ସରକାର ପୂର୍ବରୁ ପ୍ରସ୍ତୁତି ଆରମ୍ଭ କରିଛନ୍ତି । ପ୍ରଦୂଷଣ ହ୍ରାସ କରିବାକୁ ସରକାର ଏକାଧିକ ପଦକ୍ଷେପ ଘୋଷଣା କରିଛନ୍ତି । ଏଥିରେ ଡବଲ୍ ପାର୍କିଂ ଚାର୍ଜ, ୱର୍କ ଫ୍ରମ୍ ହୋମ୍ ଏବଂ କିଛି କନଷ୍ଟ୍ରକ୍ସନ୍-ଡିମୋଲିଶନ୍ କାମ ଉପରେ ରୋକ ଭଳି ବ୍ୟବସ୍ଥା ରହିଛି।
ଲୋକଙ୍କୁ ବ୍ୟକ୍ତିଗତ ଗାଡ଼ି କମ୍ ବ୍ୟବହାର କରିବା ଏବଂ ପବ୍ଲିକ୍ ଟ୍ରାନ୍ସପୋର୍ଟ ଓ ଘରୁ କାମ କରିବାକୁ ଉତ୍ସାହିତ କରିବା ପାଇଁ ପାର୍କିଂ ଚାର୍ଜ ବଢ଼ାଇବାର ବ୍ୟବସ୍ଥା କରାଯାଇଛି । ୧ ନଭେମ୍ବରରୁ ସରକାରୀ ଓ ବେସରକାରୀ କର୍ମଚାରୀଙ୍କ ୫୦ ପ୍ରତିଶତ କର୍ମଚାରୀଙ୍କ ପାଇଁ ୱର୍କ ଫ୍ରମ୍ ହୋମ୍ ବ୍ୟବସ୍ଥା ଲାଗୁ ହେବ । ଏହି ବ୍ୟବସ୍ଥା ୨୮ ଫେବ୍ରୁଆରୀ ୨୦୨୭ ପର୍ଯ୍ୟନ୍ତ ରହିବ । ଦିଲ୍ଲୀର ବିଭିନ୍ନ ସରକାରୀ ଅଫିସ୍ର ସମୟରେ ମଧ୍ୟ ପରିବର୍ତ୍ତନ ହେବ । ଦିଲ୍ଲୀ ନଗର ନିଗମ (MCD) ଅଧୀନ ଅଫିସ୍ ସକାଳ ୮ଟା ୩୦ରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିବ। ସେହିପରି ଦିଲ୍ଲୀ ସରକାରଙ୍କ ଅଧୀନ ଅଫିସ୍ ସକାଳ ୧୦ଟାରୁ ସନ୍ଧ୍ୟା ୬ଟା ୩୦ ପର୍ଯ୍ୟନ୍ତ ଚାଲିବ।
ପ୍ରଦୂଷଣ ବଢ଼ାଉଥିବା ଧୂଳିକୁ ନିୟନ୍ତ୍ରଣ କରିବା ପାଇଁ କିଛି ସମୟ ପାଇଁ ଏଭଳି କନଷ୍ଟ୍ରକ୍ସନ୍ ଓ ଡିମୋଲିଶନ୍ କାମ ଉପରେ ରୋକ ଲାଗିବ, ଯେଉଁଥିରୁ ଅଧିକ ଧୂଳି ଉଡ଼ିଥାଏ । ଗତ କିଛି ବର୍ଷ ଧରି ଦିଲ୍ଲୀରେ ଶୀତକାଳୀନ ପ୍ରଦୂଷଣ ନିୟନ୍ତ୍ରଣ ପାଇଁ ବିଭିନ୍ନ ପଦକ୍ଷେପ ନିଆଯାଇଛି। ଏଥିରେ ଅଡ୍-ଇଭେନ୍ ଭଳି ବ୍ୟବସ୍ଥା ମଧ୍ୟ ରହିଛି।ଦିଲ୍ଲୀର ବାୟୁ ପ୍ରଦୂଷଣ ପାଇଁ କେବଳ ଗାଡ଼ିରୁ ବାହାରୁଥିବା ଧୂଆଁ ନୁହେଁ, ଧୂଳି, ଶିଳ୍ପ ପ୍ରଦୂଷଣ ଓ ଅନ୍ୟାନ୍ୟ ଉତ୍ସ ମଧ୍ୟ ଦାୟୀ ବୋଲି କୁହାଯାଏ।
