ପ୍ରୟାଗରାଜରେ ଭାରତୀୟ ବାୟୁସେନାର ଏକ ପ୍ରଶିକ୍ଷାର୍ଥୀ ବିମାନ ଦୁର୍ଘଟଣାଗ୍ରସ୍ତ
1 min read
ପ୍ରୟାଗରାଜ: ପ୍ରୟାଗରାଜରେ ଭାରତୀୟ ବାୟୁସେନାର ଏକ ପ୍ରଶିକ୍ଷାର୍ଥୀ ବିମାନ ଦୁର୍ଘଟଣାଗ୍ରସ୍ତ ହୋଇଛି । ଉଡାଣ ସମୟରେ ଏକ ପୋଖରୀରେ ପଡ଼ି ଯିବାରୁ ଏହି ଦୁର୍ଘଟଣା ଘଟିଛି ।
ଉତ୍ତର ପ୍ରଦେଶର ପ୍ରୟାଗରାଜରେ ଭାରତୀୟ ବାୟୁସେନା(IAF)ର ଏକ ତାଲିମ ବିମାନ ପୋଖରୀରେ ପଡ଼ି ଦୁର୍ଘଟଣାଗ୍ରସ୍ତ ହୋଇଛି । ଉଭୟ ପାଇଲଟଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଥିବା ସୂଚନା ମିଳିଛି । ଭାରତୀୟ ବାୟୁସେନା ଘଟଣାରେ ସ୍ପଷ୍ଟ କରି କହିଛନ୍ତି ଯେ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି, ଘଟଣାରେ କୌଣସି କ୍ଷୟକ୍ଷତି ହୋଇନାହିଁ ।
ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ବିମାନଟି ପାଣିରେ ବୁଡ଼ିବା ପୂର୍ବରୁ ନିୟନ୍ତ୍ରଣ ହରାଇଥିଲା । ଜାତୀୟ ବିପର୍ଯ୍ୟୟ ପ୍ରତିକ୍ରିୟା ବାହିନୀ(NDRF) ଏବଂ ଅଗ୍ନିଶମ କର୍ମଚାରୀମାନେ ପହଞ୍ଚି ଘଟଣାସ୍ଥଳରେ ପହଞ୍ଚିବା ପୂର୍ବରୁ ଦୁର୍ଘଟଣା ସ୍ଥଳରେ ଘନ କଳା ଧୂଆଁ ଉଠିବା ଦେଖି ସ୍ଥାନୀୟ ବାସିନ୍ଦାମାନେ ସହାୟତା ପାଇଁ ଆସିଥିଲେ । ଘଟଣାସ୍ଥଳରେ ବିମାନର ଭଗ୍ନାବଶେଷ ବିସ୍ତାରିତ ହୋଇ ପଡ଼ି ରହିଛି । ତଦନ୍ତ ଚାଲିଥିବାରୁ ବିମାନକୁ ଏପର୍ଯ୍ୟନ୍ତ ବାହାର କରାଯାଇ ନାହିଁ ।
