ପାର୍କ କର୍ତ୍ତୃପକ୍ଷ ଶୁକ୍ରବାରଠାରୁ ଓ୍ବାଟର ପାର୍କ ପର୍ଯ୍ୟଟକଙ୍କ ପାଇଁ ବନ୍ଦ ରଖିଛନ୍ତି

ଭଞ୍ଜନଗର: ରାଜ୍ୟର ଏକମାତ୍ର ସରକାରୀ ଓ୍ବାଟର ପାର୍କ ଗଞ୍ଜାମ ଜିଲା ଭଞ୍ଜନଗର ଜଳସମ୍ପଦ ବିଭାଗ ଅଧୀନରେ ସ୍ଥାନୀୟ ବିଜୁ ପଟ୍ଟନାୟକ ଶିଶୁ ଉଦ୍ୟାନ ପରିସରରେ ଅଛି। ଆଜକୁ କିଛିଦିନ ହେବ ଭଞ୍ଜନଗର ଅଞ୍ଚଳରେ ବର୍ଷା ଯୋଗୁ ଓ୍ବାଟର ପାର୍କରେ ପର୍ଯ୍ୟଟକଙ୍କ ସଂଖ୍ୟା ବହୁତ ହ୍ରାସ ପାଇଛି। ଫଳରେ ପାର୍କ କ୍ଷତି ସହୁଛି। ତେଣୁ ପାର୍କ କର୍ତ୍ତୃପକ୍ଷ ଶୁକ୍ରବାରଠାରୁ ଓ୍ବାଟର ପାର୍କ ପର୍ଯ୍ୟଟକଙ୍କ ପାଇଁ ବନ୍ଦ ରଖିଛନ୍ତି। ଦଶହରା ପୂର୍ବରୁ ପାଗ ଭଲଥିବ। ଉକ୍ତ ସମୟରେ ଓ୍ବାଟର ପାର୍କ ଖୋଲିଲେ ପର୍ଯ୍ୟଟକମାନେ ମନୋରଞ୍ଜନ ପାଇଁ ଆସିବେ। ତେଣୁ ଦଶହରା ପୂଜା ସମୟରେ ଓ୍ବାଟର ପାର୍କ ଖୋଲିବା ଲକ୍ଷ୍ୟ ବିଭାଗ ପକ୍ଷରୁ ରଖାଯାଇଛି। ବର୍ତ୍ତମାନ ଦିନକୁ ୨ଶହ ପର୍ଯ୍ୟଟକ ହିଁ ଓ୍ବାଟର ପାର୍କକୁ ମନୋରଞ୍ଜନ ପାଇଁ ଯିବାର ବ୍ୟବସ୍ଥା ଅଛି। କିନ୍ତୁ ବର୍ଷା ଋତୁ ପୂର୍ବରୁ ଓ୍ବାଟର ପାର୍କରେ ପ୍ରବଳ ଭିଡ଼ ହେଉଥିଲା। ଦଶହରା ସମୟରେ ପାର୍କ ଖୋଲିଲେ ପ୍ରବଳ ଭିଡ଼ ହେବ। ତେଣୁ ୨ଶହ ବଦଳରେ ୪ଶହ ପର୍ଯ୍ୟଟକ ଓ୍ବାଟର ପାର୍କକୁ ଗଲାଭଳି ବ୍ୟବସ୍ଥା କରାଯିବାକୁ ଦାବି ହୋଇଛି। ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବା ପାଇଁ ସାଧାରଣରେ ଦାବି ହୋଇଛି। ଏନେଇ ଓ୍ବାଟର ପାର୍କ ଦାୟିତ୍ୱରେ ଥିବା ସହକାରୀ ଯନ୍ତ୍ରୀ ପ୍ରହଲ୍ଲାଦ ପଣ୍ଡାଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ବର୍ତ୍ତମାନ ବର୍ଷା ପାଇଁ ପର୍ଯ୍ୟଟକ ଆସୁନାହାନ୍ତି। ବର୍ଷା ଛାଡ଼ିବା ପରେ ଦଶହରା ପୂର୍ବରୁ ପାର୍କ ଖୋଲାଯିବ। ଅଧିକ ଲୋକ ଯେଭଳି ଓ୍ବାଟର ପାର୍କରେ ମନୋରଞ୍ଜନ କରିପାରିବେ ସେନେଇ ଆଗାମୀ ଦିନରେ ପଦକ୍ଷେପ ନିଆଯିବ।