ବିଜେପି ନେତା ଗୋପୀନାଥ ସାହୁ ଆଇଟିଆଇ ଲିମିଟେଡର ବୋର୍ଡରେ ସ୍ୱାଧୀନ ନିର୍ଦ୍ଦେଶକ ଭାବେ ନିଯୁକ୍ତ

ଭୁବନେଶ୍ଵର: ଓଡ଼ିଶାର ବରିଷ୍ଠ ବିଜେପି ନେତା ଗୋପୀନାଥ ସାହୁ ଆଇଟିଆଇ ଲିମିଟେଡର ବୋର୍ଡରେ ସ୍ୱାଧୀନ ନିର୍ଦ୍ଦେଶକ ଭାବେ ନିଯୁକ୍ତ ହୋଇଛନ୍ତି। ଏହା ଯୋଗାଯୋଗ ମନ୍ତ୍ରାଳୟର ଦୂରସଞ୍ଚାର ବିଭାଗ ଅଧୀନ ଏକ ପ୍ରମୁଖ କେନ୍ଦ୍ର ସରକାରୀ କ୍ଷେତ୍ର ଉଦ୍ୟୋଗ।

୧୯୪୮ ମସିହାରେ ପ୍ରତିଷ୍ଠିତ ଆଇଟିଆଇ ଲିମିଟେଡ ଭାରତର ସର୍ବପୁରାତନ ଦୂରସଞ୍ଚାର ଉତ୍ପାଦନକାରୀ ରାଷ୍ଟ୍ରାୟତ୍ତ କମ୍ପାନି, ଯାହା ଦେଶର ଦୂରସଞ୍ଚାର ଏବଂ ଡିଜିଟାଲ ଭିତ୍ତିଭୂମି କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ଏହାର ମୁଖ୍ୟାଳୟ ବେଙ୍ଗାଲୁରୁଠାରେ ଅବସ୍ଥିତ।

ଛାତ୍ର ରାଜନୀତିରୁ କ୍ୟାରିୟର ଆରମ୍ଭ କରିଥିବା ଗୋପୀନାଥ ସାହୁଙ୍କୁ ଓଡ଼ିଶାରେ ବିଜେପିର ପ୍ରମୁଖ ସାଂଗଠନିକ ରଣନୀତିକାରକଙ୍କ ମଧ୍ୟରେ ବିବେଚନା କରାଯାଏ। ଗୋପୀନାଥ ସାହୁ ଗତ ୨୦୧୮ ମସିହାରୁ ରାଜ୍ୟ ବିଜେପିର ଯୋଗାଯୋଗ ଓ ତଥ୍ୟ ବିଭାଗର ନେତୃତ୍ୱ ନେଉଛନ୍ତି। ୨୦୧୯ ଏବଂ ୨୦୨୪ ସାଧାରଣ ନିର୍ବାଚନ ସମୟରେ ନିର୍ବାଚନ ପରିଚାଳନାରେ ମଧ୍ୟ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲଶ।

ଗୋପୀନାଥ ସାହୁ ୧୯୯୧ ମସିହାରୁ ରାଷ୍ଟ୍ରୀୟ ସ୍ୱୟଂସେବକ ସଂଘର ଉତ୍ସର୍ଗୀକୃତ ସଦସ୍ୟ ଭାବେ କାର୍ଯ୍ୟ କରିଆସୁଛନ୍ତି। ସେ ୧୯୯୪ରୁ ୨୦୦୯ ପର୍ଯ୍ୟନ୍ତ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ର ପୂର୍ଣ୍ଣକାଳୀନ ସଦସ୍ୟ ଭାବେ କାର୍ଯ୍ୟ କରିଥିଲେ। ଏବିଭିପିରେ ସେ ରାଜ୍ୟ ସମ୍ପାଦକ, ରାଜ୍ୟ ସଂଗଠନ ସମ୍ପାଦକ ଏବଂ କେନ୍ଦ୍ରୀୟ ସମିତିର ସଦସ୍ୟ ସମେତ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିଛନ୍ତି। ସେ ୨୦୦୪ରୁ ୨୦୦୮ ପର୍ଯ୍ୟନ୍ତ ସଂଘର ପ୍ରଚାରକ ଭାବେ କାର୍ଯ୍ୟ କରିଛନ୍ତି। ୨୦୧୮ ମସିହାରେ ଆନୁଷ୍ଠାନିକ ଭାବେ ଗୋପୀନାଥ ସାହୁ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ।

ସେ ଉତ୍କଳ ବିଶ୍ୱ ବିଦ୍ୟାଳୟରୁ ଉଭୟ ଓଡ଼ିଆ ଭାଷା ଓ ସାହିତ୍ୟରେ ସ୍ନାତକୋତ୍ତର ଏବଂ ଆଇନରେ ସ୍ନାତକ ଡିଗ୍ରି ହାସଲକରିଛନ୍ତି। ୨୦୧୫ ରୁ ୨୦୨୧ ପର୍ଯ୍ୟନ୍ତ କେନ୍ଦ୍ର ଶିକ୍ଷା ମନ୍ତ୍ରାଳୟର ଭାରତବାଣୀ ପ୍ରକଳ୍ପର ରିସୋର୍ସ ପର୍ସନ ଭାବେ ସେ କାର୍ଯ୍ୟ କରିଥିଲେ। ୨୦୧୧ରୁ ୨୦୧୫ ପର୍ଯ୍ୟନ୍ତ ସେ ବିଜ୍ଞାପନ ସଂସ୍ଥା ମ୍ୟାଗନମ୍ ଇଣ୍ଟରଗ୍ରାଫିକ୍ସର ଓଡ଼ିଶା ମୁଖ୍ୟ ଭାବେ କାର୍ଯ୍ୟ କରିଥିଲେ। ୨୦୧୦ରୁ ୨୦୧୧ ପର୍ଯ୍ୟନ୍ତ ଜାତୀୟ ଯୁବ ସମବାୟ ସଂସ୍ଥାର ରାଜ୍ୟ ସଂଯୋଜକ ଭାବେ କାର୍ଯ୍ୟ କରିଥିଲେ।

ଆଇଟିଆଇ ଲିମିଟେଡର ବୋର୍ଡରେ ସ୍ୱାଧୀନ ନିର୍ଦ୍ଦେଶକ ଭାବରେ ନିଯୁକ୍ତି ମିଳିବା ପରେ ଗୋପୀନାଥ ସାହୁଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି।