ଭାରତୀୟ ଅଲିମ୍ପିକ୍ ଆସୋସିଏସନ୍ ସଭାପତି ଏବଂ ରାଜ୍ୟସଭା ସାଂସଦ ପି.ଟି. ଉଷାଙ୍କ ସ୍ୱାମୀ ଭି. ଶ୍ରୀନିବାସନଙ୍କ ଶୁକ୍ରବାର ସକାଳେ ଦେହାନ୍ତ

ତିରୁବନନ୍ତପୁରମ: ଭାରତୀୟ ଅଲିମ୍ପିକ୍ ଆସୋସିଏସନ୍ ସଭାପତି ଏବଂ ରାଜ୍ୟସଭା ସାଂସଦ ପି.ଟି. ଉଷାଙ୍କ ସ୍ୱାମୀ ଭି. ଶ୍ରୀନିବାସନଙ୍କ ଶୁକ୍ରବାର ସକାଳେ ଦେହାନ୍ତ ହୋଇଯାଇଛି। ଶ୍ରୀନିବାସନ ଗୁରୁବାର-ଶୁକ୍ରବାର ରାତି ପ୍ରାୟ ୧ଟା ସମୟରେ ଥିକୋଡି ପେରୁମାଲପୁରମସ୍ଥିତ ତାଙ୍କ ଘରେ ପଡ଼ି ଯାଇଥିଲେ। ତାଙ୍କୁ ତୁରନ୍ତ ନିକଟସ୍ଥ ଏକ ଘରୋଇ ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣା ସମୟରେ ପି.ଟି. ଉଷା ଘରେ ଉପସ୍ଥିତ ନଥିଲେ।
ପି.ଟି. ଉଷାଙ୍କ ସ୍ୱାମୀ, ଭି. ଶ୍ରୀନିବାସନଙ୍କ ବୟସ ୬୭ ବର୍ଷ ଥିଲା। କୁଟିକ୍କାଡ ପୋନାନିର ଭେଙ୍ଗାଲି ଥରାଭାଡରେ ନାରାୟଣନ ଏବଂ ସରୋଜିନୀଙ୍କ ଔରସରେ ଭି. ଶ୍ରୀନିବାସନ ଜନ୍ମଗ୍ରହଣ କରିଥିଲେ। ସେ କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସ୍‌ଏଫ୍‌)ରୁ ଡେପୁଟି ସୁପରିଣ୍ଟେଣ୍ଡେଣ୍ଟ ଭାବରେ ଅବସର ନେଇଥିଲେ। ସେ ୧୯୯୧ ମସିହାରେ ଦୂର ସମ୍ପର୍କୀୟ ପି.ଟି. ଉଷାଙ୍କୁ ବିବାହ କରିଥିଲେ। ଶ୍ରୀନିବାସନଙ୍କ ଅନ୍ତିମ ସଂସ୍କାର ପାଇଁ ବ୍ୟବସ୍ଥା ଏପର୍ଯ୍ୟନ୍ତ ଚୂଡ଼ାନ୍ତ ହୋଇନାହିଁ। ତାଙ୍କର ହଠାତ୍ ମୃତ୍ୟୁ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।