ହୋଟେଲରେ ଏକ ଭୟଙ୍କର ଅଗ୍ନିକାଣ୍ଡ ଘଟି ସାତ ଜଣଙ୍କର ମୃତ୍ୟୁ

କଲକାତା : ସୋମବାର ବଙ୍ଗଳାରୁ ଏକ ଦୁଃଖଦ ଖବର ଆସିଛି। ବୀରଭୂମିର ତାରାପୀଠରେ ଏକ ହୋଟେଲରେ ଏକ ଭୟଙ୍କର ଅଗ୍ନିକାଣ୍ଡ ଘଟି ସାତ ଜଣଙ୍କର ମୃତ୍ୟୁ ହୋଇଛି। ପୁଲିସ ଠାରୁ ମିଳିଥିବା ସୂଚନାନୁସାରେ, ଅନେକ ଲୋକ ପୋଡ଼ି ଆହତ ହୋଇଥିବା ମଧ୍ୟ ରିପୋର୍ଟ ହୋଇଛି।

ତାରାପୀଠର ମନ୍ଦିର ଅଞ୍ଚଳରେ ଅବସ୍ଥିତ ଚାରି ମହଲା ବିଶିଷ୍ଟ ହୋଟେଲର ପ୍ରଥମ ମହଲାରେ ସକାଳ ପ୍ରାୟ ୫ଟା ସମୟରେ ଅଗ୍ନିକାଣ୍ଡ ଘଟିଥିଲା। ସେହି ସମୟରେ ଭିତରେ ଥିବା ଅଧିକାଂଶ ଲୋକ ଶୋଇଥିଲେ। ଅଗ୍ନିକାଣ୍ଡ ସମ୍ପର୍କରେ ସୂଚନା ପାଇ ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲା।
ଆହତମାନଙ୍କୁ ରାମପୁରହାଟ ସରକାରୀ ମେଡିକାଲ କଲେଜ ଏବଂ ହସ୍ପିଟାଲକୁ ନିଆଯାଇଥିଲା। ହସ୍ପିଟାଲ ସୂତ୍ରରେ ପ୍ରଥମେ ଅଗ୍ନିକାଣ୍ଡରେ ପାଞ୍ଚ ଜଣଙ୍କର ମୃତ୍ୟୁ ହୋଇଥିବା ସୂଚନା ଦିଆଯାଇଥିଲା। କିନ୍ତୁ, ପରେ ମୃତ୍ୟୁ ସଂଖ୍ୟା ସାତକୁ ବୃଦ୍ଧି ପାଇଥିଲା।
ହୋଟେଲ ଅଧିକାରୀମାନେ ଦାବି କରିଛନ୍ତି ଯେ ସର୍ଟ ସର୍କିଟ ଯୋଗୁଁଁ ଅଗ୍ନିକାଣ୍ଡ ଘଟିଛି। କଲକାତାର ଜଣେ ମହିଳା ନିଆଁରୁ ବଞ୍ଚି ପାରିଛନ୍ତି। ସେ କହିଛନ୍ତି, ହଠାତ୍ ସମଗ୍ର ହୋଟେଲ ଧୂଆଁରେ ପରିପୂର୍ଣ୍ଣ ହୋଇଗଲା। ନିଶ୍ୱାସ ନେବା କଷ୍ଟକର ହୋଇଗଲା, ଏବଂ ବାହାରକୁ ଯିବା ପାଇଁ ରାସ୍ତା ଖୋଜିବା ମଧ୍ୟ ଅତ୍ୟନ୍ତ କଷ୍ଟକର ହୋଇଗଲା।” ଅଧିକାରୀମାନେ କହିଛନ୍ତି ଯେ ମୃତକଙ୍କ ମଧ୍ୟରୁ କିଛି ଭକ୍ତ ପ୍ରସିଦ୍ଧ କାଳୀ ମନ୍ଦିରରେ ପୂଜା କରିବା ପାଇଁ ତାରାପୀଠ ଆସିଥିଲେ।