ଜଟିଆ ଷ୍ଟିଲର କଳାଧୂଆଁରେ ଅତିଷ୍ଠ ଜଖପୁରାବାସୀ

ଜଖପୁରା/ଯାଜପୁର,୨୮/୦୬: ଯାଜପୁର ଜିଲ୍ଲାର ଜଖପୁରା ଅଞ୍ଚଳରେ ଅବସ୍ଥିତ ଜଟିଆ ଷ୍ଟିଲ କାରଖାନାରୁ ନିର୍ଗତ ହେଉଥିବା କଳା ଧୂଆଁକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ତୀବ୍ର ହୋଇଛି। ଗ୍ରାମବାସୀଙ୍କ ଅଭିଯୋଗ ଅନୁସାରେ, ଦୀର୍ଘଦିନ ଧରି କାରଖାନାର ଚିମିନିରୁ ଘନ କଳା ଧୂଆଁ ନିର୍ଗତ ହେଉଥିବାରୁ ପରିବେଶ ପ୍ରଦୂଷିତ ହେଉଛି ଏବଂ ସାଧାରଣ ଲୋକଙ୍କ ସ୍ୱାସ୍ଥ୍ୟ ସହ ଚାଷବାସ ଉପରେ ମଧ୍ୟ ପ୍ରଭାବ ପଡ଼ୁଛି।
ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ, ଦିନ ଓ ରାତିରେ ନିର୍ଗତ ଧୂଆଁ ପବନ ସହ ଗ୍ରାମ ଭିତରକୁ ପ୍ରବେଶ କରୁଛି। ଫଳରେ ଘରର ଛାତ, ପାନୀୟ ଜଳ, ଗଛପତ୍ର ଓ ଚାଷଜମି ଉପରେ କଳା ଧୂଳିକଣା ଜମୁଥିବା ସହ ଶ୍ୱାସକ୍ରିୟା ଜନିତ ବିଭିନ୍ନ ସମସ୍ୟା ଦେଖାଦେଉଥିବା ଦାବି କରାଯାଇଛି।
ଏଭଳି ଅଭିଯୋଗ ଦୀର୍ଘଦିନ ଧରି ଉଠୁଥିବା ସତ୍ତ୍ୱେ ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବିଭାଗ ପକ୍ଷରୁ କୌଣସି ଦୃଶ୍ୟମାନ ଯାଞ୍ଚ କିମ୍ବା ପଦକ୍ଷେପ ସାମ୍ନାକୁ ନ ଆସିବାକୁ ନେଇ ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି। ପ୍ରଦୂଷଣ ନିୟନ୍ତ୍ରଣ ଭଳି ସମ୍ବେଦନଶୀଳ ପ୍ରସଙ୍ଗରେ ବିଭାଗର ନିରବତା ଜନସାଧାରଣଙ୍କ ମଧ୍ୟରେ ସନ୍ଦେହ ଓ ଅସନ୍ତୋଷ ସୃଷ୍ଟି କରୁଥିବା ମତ ପ୍ରକାଶ ପାଇଛି।
ସ୍ଥାନୀୟଙ୍କ ପ୍ରଶ୍ନ, ଯଦି କାରଖାନା ପ୍ରଦୂଷଣ ନିୟନ୍ତ୍ରଣ ନିୟମ ମାନୁଛି, ତେବେ ଏତେ ପରିମାଣର କଳା ଧୂଆଁ କିପରି ନିର୍ଗତ ହେଉଛି? ଆଉ ଯଦି ନିୟମ ଉଲ୍ଲଂଘନ ହେଉଛି, ତେବେ ତାହା ବିରୋଧରେ ସମ୍ପୃକ୍ତ ବିଭାଗ କାହିଁକି ନିରବ ରହିଛି? ଏହି ପ୍ରଶ୍ନ ବର୍ତ୍ତମାନ ସାଧାରଣ ଲୋକଙ୍କ ମଧ୍ୟରେ ଚର୍ଚ୍ଚାର ବିଷୟ ପାଲଟିଛି।
ଗ୍ରାମବାସୀମାନେ ଦାବି କରିଛନ୍ତି ଯେ, ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବିଭାଗ ତୁରନ୍ତ ଘଟଣାସ୍ଥଳକୁ ଯାଇ କାରଖାନାର ନିର୍ଗମନ ବ୍ୟବସ୍ଥା, ବାୟୁ ପ୍ରଦୂଷଣର ମାତ୍ରା ଏବଂ ପ୍ରଦୂଷଣ ନିୟନ୍ତ୍ରଣ ଉପକରଣର କାର୍ଯ୍ୟକ୍ଷମତାର ସ୍ୱଚ୍ଛ ଯାଞ୍ଚ କରନ୍ତୁ। ଯାଞ୍ଚରେ କୌଣସି ଅନିୟମିତତା ପ୍ରମାଣିତ ହେଲେ, ପ୍ରଚଳିତ ଆଇନ ଅନୁଯାୟୀ ଦୃଢ଼ ପଦକ୍ଷେପ ନିଆଯାଉ ବୋଲି ସେମାନେ ଦାବି କରିଛନ୍ତି।