ପଶ୍ଚିମବଙ୍ଗର ବିଜେପି ସରକାର ସୋମବାର (ଜୁନ୍ ୨୨) ବିଧାନସଭାରେ ଆର୍ଥିକ ବର୍ଷ ୨୦୨୬-୨୭ ପାଇଁ ପ୍ରଥମ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ

କୋଲକାତା: ପଶ୍ଚିମବଙ୍ଗର ବିଜେପି ସରକାର ସୋମବାର (ଜୁନ୍ ୨୨) ବିଧାନସଭାରେ ଆର୍ଥିକ ବର୍ଷ ୨୦୨୬-୨୭ ପାଇଁ ପ୍ରଥମ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିଛନ୍ତି। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସରକାର ବଜେଟ୍‌ରେ ଅନେକ ବଡ଼ ଘୋଷଣା କରିଛନ୍ତି। ଏକ ଲକ୍ଷ ସରକାରୀ ଚାକିରିଠାରୁ ଆରମ୍ଭ କରି ମହିଳାଙ୍କ ପାଇଁ ମାଗଣା ବସ୍ ସେବା ଏବଂ କର୍ମଚାରୀଙ୍କ ମହଙ୍ଗାଭତ୍ତାରେ ୨୦% ବୃଦ୍ଧି ଆଦି ଅନ୍ତର୍ଭୁକ୍ତ ରହିଛି। ବଜେଟ୍ ଉପସ୍ଥାପନ କରିବା ପୂର୍ବରୁ, ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଏବଂ ଅର୍ଥମନ୍ତ୍ରୀ ସ୍ୱପନ ଦାସଗୁପ୍ତା ପୂଜା ଅର୍ଚ୍ଚନା କରିଥିଲେ। ଗୁରୁତ୍ୱପୂର୍ଣ୍ଣ କଥା ହେଉଛି ସାଂସ୍କୃତିକ ପରିଚୟ ଏବଂ ରାଜ୍ୟ ହସ୍ତଶିଳ୍ପର ପ୍ରତୀକ ଭାବେ ବଜେଟ୍ ଡକ୍ୟୁମେଣ୍ଟକୁ ପାରମ୍ପରିକ ବଙ୍ଗାଳୀ ଚଟେଇ ଏବଂ ଝୋଟରୁ ତିଆରି ଏକ ଫାଇଲରେ ବିଧାନସଭାକୁ ଅଣାଯାଇଥିଲା।

ରାଜ୍ୟରେ ଚାଲିଥିବା ସମସ୍ତ ସାମାଜିକ ପ୍ରକଳ୍ପ ଜାରି ରହିବ
ବଜେଟ୍ ଭାଷଣର ଆରମ୍ଭରେ, ଅର୍ଥମନ୍ତ୍ରୀ ସ୍ୱପନ ଦାସଗୁପ୍ତା ରାଜ୍ୟର ଆର୍ଥିକ ସ୍ଥିତି ବିଷୟରେ ଏକ ଗୁରୁତ୍ୱପୂର୍ଣ୍ଣ କଥା ପ୍ରକାଶ କରିଥିଲେ। ସେ କହିଥିଲେ, ରାଜ୍ୟ ଉପରେ ୮୫୫ ହଜାର କୋଟିର ଋଣ ଅଛି। ଅର୍ଥମନ୍ତ୍ରୀ ସ୍ପଷ୍ଟ ଭାବରେ ଘୋଷଣା କରିଥିଲେ ଯେ, ରାଜ୍ୟରେ ଚାଲିଥିବା ସମସ୍ତ ସାମାଜିକ ପ୍ରକଳ୍ପ ଜାରି ରହିବ। ଏହି ବିବୃତିକୁ ସରକାରଙ୍କ କଲ୍ୟାଣକାରୀ ଯୋଜନା ପ୍ରତି ପ୍ରତିବଦ୍ଧତା ଭାବରେ ଦେଖାଯାଉଛି।ସରକାର ରାଜ୍ୟରେ ୧ ଲକ୍ଷ ଖାଲି ପଦବୀ ପୂରଣ କରିବାକୁ ଯୋଜନା ଘୋଷଣା କରିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ପଦବୀ ମଧ୍ୟରୁ ୩୩ ପ୍ରତିଶତ ମହିଳାମାନଙ୍କ ପାଇଁ ସଂରକ୍ଷିତ ରହିବ। ଯାହା ମହିଳା ସଶକ୍ତିକରଣକୁ ପ୍ରୋତ୍ସାହିତ କରିବ ଏବଂ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ଆଶା କରାଯାଉଛି।ବିଧାନସଭାରେ ବଜେଟ୍ ଉପସ୍ଥାପନ କରି ଅର୍ଥମନ୍ତ୍ରୀ ସ୍ୱପନ ଦାସଗୁପ୍ତା କହିଛନ୍ତି, ଆମେ ଏକ ଦୁର୍ନୀତିମୁକ୍ତ ବ୍ୟବସ୍ଥା ବିକଶିତ କରିବାକୁ ଚାହୁଁଛୁ, ଏବଂ ନୂତନ ସରକାରଙ୍କ ଲକ୍ଷ୍ୟ ହେଉଛି ଏକ ବିକଶିତ ଏବଂ ଭବିଷ୍ୟତ ପାଇଁ ପ୍ରସ୍ତୁତ ରାଜ୍ୟ ସୃଷ୍ଟି କରିବା। ବଜେଟର ସବୁଠାରୁ ବଡ଼ ଘୋଷଣାଗୁଡ଼ିକ ମଧ୍ୟରେ ରାଜ୍ୟ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ମହଙ୍ଗା ଭତ୍ତା (ଡିଏ) ରେ ୨୦ ପ୍ରତିଶତ ବୃଦ୍ଧି କରାଯାଇଛି। ଏହା ଦ୍ବାରା ମୋଟ ଡିଏ ୩୮ ପ୍ରତିଶତକୁ ବୃଦ୍ଧି ପାଇବ। ଅର୍ଥମନ୍ତ୍ରୀ କହିଛନ୍ତି ଯେ ଏହି ନିଷ୍ପତ୍ତି ପିଛିଲା ଭାବେ ୧ ଏପ୍ରିଲ ୨୦୨୬ ରୁ କାର୍ଯ୍ୟକାରୀ ହେବ।
ସରକାର ରାଜ୍ୟ ପରିବହନ ନିଗମ ବସ୍ କଣ୍ଡକ୍ଟରଙ୍କ ପାରିଶ୍ରମିକ ବୃଦ୍ଧି ଘୋଷଣା କରିଛନ୍ତି। ଅବସରପ୍ରାପ୍ତ ସାମ୍ବାଦିକଙ୍କ ପାଇଁ ମାସିକ ୫ ହଜାର ଟଙ୍କା ପେନସନ ଘୋଷଣା ମଧ୍ୟ ଦୃଷ୍ଟି ଆକର୍ଷଣ କରିଛି। ଏହି ନିଷ୍ପତ୍ତିଗୁଡ଼ିକ ଲକ୍ଷ ଲକ୍ଷ କର୍ମଚାରୀ, ପେନସନଭୋଗୀ ଏବଂ ସାମ୍ବାଦିକ ସମାଜକୁ ସିଧାସଳଖ ଲାଭ ଦେବ ବୋଲି ଆଶା କରାଯାଉଛି।
ପଶ୍ଚିମବଙ୍ଗର ବିଜେପି ସରକାର ଜିରାମଜି ଯୋଜନା ପାଇଁ ୧୪ ହଜାର ଟଙ୍କାର କୋଟି ବଜେଟ୍ ବ୍ୟବସ୍ଥା ଘୋଷଣା କରିଛନ୍ତି। ମହିଳାମାନଙ୍କ ପାଇଁ ମାଗଣା ବସ୍ ସେବା ଜାରି ରଖିବା ପାଇଁ ୫୫୦ କୋଟି ଟଙ୍କାର ବ୍ୟୟବରାଦ କରାଯାଇଛି। ଏହି ସୁବିଧାର ଲାଭ ପ୍ରଦାନ କରିବା ପାଇଁ ସରକାର ଗୋଲାପୀ କାର୍ଡ ଜାରି କରିବେ