ଆମେରିକାର ବୈଦେଶିକ ମନ୍ତ୍ରୀ, ପ୍ରତିରକ୍ଷା ସଚିବଙ୍କ ଘର ଉପରେ ଡ୍ରୋନ୍ ଦୃଶ୍ୟମାନ

ୱାସିଂଟନ: ଆମେରିକାର ରାଜଧାନୀ ୱାସିଂଟନ୍ ଡିସିରେ ଏକ ସେନା ଘାଟି ଉପରେ ଅଜଣା ଡ୍ରୋନ୍ ଦେଖା ଯାଇଛି। ଅଧିକାରୀମାନେ ଏବେ ଦାୟୀଙ୍କୁ ଚିହ୍ନଟ କରିବା ପାଇଁ କାମ କରୁଛନ୍ତି। ୱାସିଂଟନ୍ ପୋଷ୍ଟର ଏକ ରିପୋର୍ଟ ଅନୁଯାୟୀ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏବଂ ପ୍ରତିରକ୍ଷା ସଚିବ ପିଟ୍ ହେଗସେଥ୍ ୱାଶିଂଟନର ଏହି ଅଞ୍ଚଳରେ ରୁହନ୍ତି। ଆମେରିକାରେ ଏହି ଡ୍ରୋନ୍ ଦେଖାଯିବା ବିଶ୍ୱ ଉତ୍ତେଜନା ବୃଦ୍ଧି ପାଇଥିବା ସମୟରେ ଆସିଛି। ମଧ୍ୟପ୍ରାଚ୍ୟରେ ବଢ଼ୁଥିବା ସଂଘର୍ଷ ଯୋଗୁଁ ପ୍ରମୁଖ ଆମେରିକୀୟ ସାମରିକ ଏବଂ ସରକାରୀ ପ୍ରତିଷ୍ଠାନଗୁଡିକ ପାଖରେ ସୁରକ୍ଷା ବୃଦ୍ଧି କରାଯାଇଛି।ଆମେରିକାର ଫେଡେରାଲ୍ ବ୍ୟୁରୋ ଅଫ୍ ଇନ୍ଭେଷ୍ଟିଗେସନ୍ (ଏଫ୍‌ବିଆଇ) ପୂର୍ବରୁ ଇରାନରୁ ସମ୍ଭାବ୍ୟ ଡ୍ରୋନ୍ ଆକ୍ରମଣ ବିଷୟରେ କାଲିଫର୍ନିଆ ପୁଲିସକୁ ସତର୍କ କରିଥିଲା। ଏଫ୍‌ବିଆଇ ଫେବ୍ରୁଆରିରେ ଏହି ଚେତାବନୀ ଜାରି କରିଥିଲା। ଚେତାବନୀରେ ଲକ୍ଷ୍ୟ କିମ୍ବା ସମୟ ବିଷୟରେ କୌଣସି ସୂଚନା ପ୍ରଦାନ କରାଯାଇ ନଥିଲା।