ଭାରତ-ପାକ୍ ଉତ୍ତେଜନା ମଧ୍ୟରେ ପାକିସ୍ତାନକୁ ତୁର୍କୀ ସମର୍ଥନ କରିବା ପରେ ଦିଲ୍ଲୀର ଫଳ ବଜାରରେ ତୁର୍କୀ ସେଓ ବର୍ଜନ

ନୂଆଦିଲ୍ଲୀ: ଭାରତ-ପାକ୍ ଉତ୍ତେଜନା ମଧ୍ୟରେ ପାକିସ୍ତାନକୁ ତୁର୍କୀ ସମର୍ଥନ କରିବା ପରେ ଦିଲ୍ଲୀର ଫଳ ବଜାରରେ ତୁର୍କୀ ସେଓ ବର୍ଜନ ଜୋର ଧରିଛି। ପରିଣାମସ୍ୱରୂପ, ବ୍ୟବସାୟୀ ଏବଂ ଗ୍ରାହକମାନେ ତୁର୍କୀ ସେଓ କିଣିବା ବନ୍ଦ କରିଦେଇଛନ୍ତି, ଯାହା ଫଳରେ ବଜାରରେ ଏହି ସେଓର ଯୋଗାଣ ପ୍ରାୟ ଶୂନ୍ୟ ହୋଇଯାଇଛି। ଅନ୍ୟପକ୍ଷରେ, ଗ୍ରାହକମାନେ ସ୍ୱଦେଶୀ ବିକଳ୍ପ ଆଡ଼କୁ ମୁହାଁଇଥିବାରୁ କାଶ୍ମୀରୀ ଅମ୍ବରୀ ସେଓର ଚାହିଦା ବୃଦ୍ଧି ପାଉଛି।

ଦିଲ୍ଲୀର ଆଜାଦପୁର ମଣ୍ଡି, ଓଖଲା ମଣ୍ଡି ଏବଂ ଅନ୍ୟାନ୍ୟ ମଣ୍ଡିରେ ତୁର୍କୀ ସେଓ ବ୍ୟବସାୟ ହୋଇଥାଏ। ବ୍ୟବସାୟୀମାନେ ସେଠାରୁ ସେଓ ଆମଦାନୀ ବନ୍ଦ କରିଦେଇଛନ୍ତି। ଫଳରେ ତୁର୍କୀ ସେଓର ବିକ୍ରୟ ହ୍ରାସ ପାଇଛି। ଏହାଦ୍ୱାରା କାଶ୍ମୀର ବ୍ୟବସାୟୀମାନେ ସିଧାସଳଖ ଲାଭ ପାଉଛନ୍ତି। କାଶ୍ମୀର ସେଓର ଚାହିଦା ପ୍ରାୟ ୨୫ ରୁ ୩୦ ପ୍ରତିଶତ ବୃଦ୍ଧି ପାଇଛି। ବ୍ୟବସାୟୀମାନେ କହିଛନ୍ତି ଯେ, ସେମାନେ ତୁର୍କୀ ସେଓକୁ ବର୍ଜନ କରି ଆମଦାନୀ ମଧ୍ୟ ବନ୍ଦ କରିଦେଇଛନ୍ତି।