ଭାରତୀୟ ବିମାନ ପାଇଁ ଏୟାରସ୍ପେସ୍ ବନ୍ଦ କରି ଦୁଇ ମାସରେ ପାକିସ୍ତାନ ପ୍ରାୟ ୧୨୭ କୋଟି ଟଙ୍କା କ୍ଷତି ସହିଛି

ଇସଲାମାବାଦ: ଭାରତ ପାଇଁ ଏୟାରସ୍ପେସ୍ ବନ୍ଦ କରିବା ପାକିସ୍ତାନ ପାଇଁ ବହୁତ ମହଙ୍ଗା ସାବ୍ୟସ୍ତ ହୋଇଛି।ରିପୋର୍ଟରେ ପ୍ରକାଶ ପାଇଛି ଯେ, ଭାରତୀୟ ବିମାନ ପାଇଁ ଏୟାରସ୍ପେସ୍ ବନ୍ଦ କରିବା ଯୋଗୁଁ ପାକିସ୍ତାନ ଦୁଇ ମାସରେ ୧୨୭ କୋଟି ଟଙ୍କାର କ୍ଷତି ସହିଛି। ୨୩ ଏପ୍ରିଲରେ ଭାରତ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବାର ନିଷ୍ପତ୍ତି ନେବା ପରେ ପାକିସ୍ତାନ ଭାରତୀୟ ବିମାନ ପାଇଁ ନିଜର ଏୟାରସ୍ପେସ୍ ବନ୍ଦ କରିଦେଇଥିଲା।

ଭାରତ ଏବଂ ପାକିସ୍ତାନ ମଧ୍ୟରେ ବିବାଦ ଯୋଗୁ ପାକିସ୍ତାନକୁ ବହୁତ କ୍ଷତି ସହିବାକୁ ପଡିଛି। ଏହି ସୂଚନା ପାକିସ୍ତାନର ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଦିଆଯାଇଛି। ପାକିସ୍ତାନର ସଂସଦରେ କୁହାଯାଇଛି ଯେ, ବାୟୁକ୍ଷେତ୍ର ବନ୍ଦ ହେବା ଯୋଗୁ ପ୍ରତିଦିନ ୧୦୦ ରୁ ଅଧିକ ବିମାନ ପ୍ରଭାବିତ ହେଉଛି। ଏହି କାରଣରୁ, ୨୪ଏପ୍ରିଲରୁ ୩୦ ଜୁନ୍ ମଧ୍ୟରେ ପାକିସ୍ତାନକୁ ୪.୧୦ ବିଲିୟନ ପାକିସ୍ତାନୀ ଟଙ୍କା (ପ୍ରାୟ ୧୨୭ କୋଟି ଭାରତୀୟ ଟଙ୍କା)ର କ୍ଷତି ସହିବାକୁ ପଡିଛି।

ଯଦିଓ ପାକିସ୍ତାନ ଏୟାରସ୍ପେସ୍ ବନ୍ଦ ହେବା ଯୋଗୁଁ ବହୁତ କ୍ଷତି ସହିଛି, କିନ୍ତୁ ପାକିସ୍ତାନ ଏୟାରପୋର୍ଟ ଅଥରିଟିର ଆୟ ବୃଦ୍ଧି ପାଇଛି। କ୍ଷତି ସତ୍ତ୍ୱେ, ପାକିସ୍ତାନ ଏୟାରସ୍ପେସ୍ ଅଥରିଟିର ମୋଟ ରାଜସ୍ୱ ୨୦୧୯ରେ ୫୦୮,୦୦୦ ଡଲାର ରୁ ୨୦୨୫ରେ ୭୬୦,୦୦୦ ଡଲାରରେ ପହଞ୍ଚିଛି। ୨୦୧୯ରେ, ପାକିସ୍ତାନ ପ୍ରତିଦିନ ବିମାନଗୁଡ଼ିକ ଦେଇ ଯାଉଥିବାରୁ ୪.୨୪ କୋଟି ଟଙ୍କା ରୋଜଗାର କରୁଥିଲା, ଯାହା ୨୦୨୫ରେ ବୃଦ୍ଧି ପାଇ ୬.୩୫ କୋଟି ଟଙ୍କା ହୋଇଛି। ଏହି କାରଣରୁ ପାକିସ୍ତାନ ଏୟାରସ୍ପେସ୍ ବନ୍ଦ କରିବା ପରେ ମଧ୍ୟ କ୍ଷତି ସହି ନାହିଁ।