ଯୁବତୀଙ୍କୁ ନିଶା ଦେଇ ଦୁଷ୍କର୍ମ କରିବା ଅଭିଯୋଗରେ ଗିରଫ ହେଲେ ଓଡ଼ିଶା ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ

ଭୁବନେଶ୍ଵର : ଜଣେ ଯୁବତୀଙ୍କୁ ନିଶା ଦେଇ ଦୁଷ୍କର୍ମ କରିବା ଅଭିଯୋଗରେ ଗିରଫ ହେଲେ ଓଡ଼ିଶା ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ। ଗିରଫ ପରେ ଉଦିତ ପ୍ରଧାନଙ୍କୁ ରାଜ୍ୟ ଛାତ୍ର କଂଗ୍ରେସ ସଭାପତି ପଦରୁ ନିଲମ୍ବନ କରାଯାଇଛି।

ଉଦିତ ପ୍ରଧାନଙ୍କୁ ନିଲମ୍ବିତ କରିବା ସହ ‘ଏନଏସୟୁଆଇ’ର ଜାତୀୟ ସଭାପତି ବରୁଣ ଚୌଧରୀ ପ୍ରେସବିବୃତି ଜାରି କରି କହିଛନ୍ତି, ଏପରି ଅଭିଯୋଗ ବିରୋଧରେ ଶୂନ ସହନଶୀଳତା ନୀତି ଆପଣାଇ ଆସିଛି ‘ଏନଏସୟୁଆଇ’।

ଅଭିଯୋଗ ଅନୁସାରେ ଗତ ମାର୍ଚ୍ଚ ୧୮ ତାରିଖରେ ଯୁବତୀଙ୍କୁ ଥଣ୍ଡା ପାନୀୟରେ ନିଶା ମିଶାଇ ପିଇବାକୁ ଦେଇଥିଲେ ଉଦିତ ପ୍ରଧାନ। ପରେ ଯୁବତୀଙ୍କ ସହ ସେ ଦୁଷ୍କର୍ମ କରିଥିଲେ। ଘଟଣା ସମ୍ପର୍କରେ କାହାରିକୁ ଜଣେଇଲେ ପରିଣାମ ଭଲ ହେବେ ନାହିଁ ବୋଲି ଯୁବତୀଙ୍କୁ ଧମକ ଦେଇଥିଲେ ଉଦିତ।

ତେବେ ଜୁଲାଇ ୨୦ ତାରିଖରେ ଉଦିତ ପ୍ରଧାନଙ୍କ ବିରୋଧରେ ମଞ୍ଚେଶ୍ଵର ଥାନାରେ ଦୁଷ୍କର୍ମ ଅଭିଯୋଗ ଆଣିଥିଲେ ଯୁବତୀ। ପୋଲିସ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଉଦିତଙ୍କ ବିରୋଧରେ ୫ଟି ସଙ୍ଗୀନ ଦଫା ଲଗାଯାଇଛି।

ଏପଟେ ଉଦିତଙ୍କ ଗିରଫ ପରେ ପିସିସି ସଭାପତିଙ୍କ ନିର୍ଦ୍ଦେଶ କ୍ରମେ ୬ ଜଣିଆ ତଥ୍ୟ ଅନୁଧ୍ୟାନ କମିଟି ଗଠନ ହୋଇଛି। ଏହି କମିଟି ପୀଡ଼ିତାଙ୍କୁ ଭେଟି ଆଲୋଚନା କରିବ।