ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)-୨୦୨୫ ଅନ୍ତିମ ଚରଣରେ ପହଞ୍ଚିଛି
1 min read
ମୁଲାନପୁର: ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)-୨୦୨୫ ଅନ୍ତିମ ଚରଣରେ ପହଞ୍ଚିଛି। ଲିଗ୍ ପର୍ଯ୍ୟାୟ ଶେଷ ହୋଇଥିବାବେଳେ ଟେବୁଲର ପ୍ରଥମ ଦୁଇ ସ୍ଥାନରେ ଥିବା ପଞ୍ଜାବ କିଙ୍ଗ୍ସ ଓ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ କ୍ବାଲିଫାୟର-୧ ଗୁରୁବାର ଖେଳାଯିବ। ଉକ୍ତ ମ୍ୟାଚ ମୁଲାନପୁରରେ ଖେଳାଯିବ। ଏହି ମ୍ୟାଚକୁ ଜିତି ଉଭୟ ଦଳ ପ୍ରଥମେ ଫାଇନାଲରେ ସ୍ଥାନ ସୁରକ୍ଷିତ ରଖିବାକୁ ଉଦ୍ୟମ କରିବେ। ଦୁଇ ଦଳ ଏପର୍ଯ୍ୟନ୍ତ ଆଇପିଏଲ ଟ୍ରଫି ଜିତିପାରିନାହାନ୍ତି। ଉକ୍ତ ଟ୍ରଫି ସ୍ବପ୍ନକୁ ପୂରଣ କରିବା ନେଇ ଉଭୟ ଦଳ ମ୍ୟାଚକୁ ଜିତି ଫାଇନାଲରେ ସ୍ଥାନ ସୁରକ୍ଷିତ ନେଇ ଲକ୍ଷ୍ୟ ରଖିଛନ୍ତି। ପଞ୍ଜାବ କିଙ୍ଗ୍ସ ୧୧ ବର୍ଷ ପରେ ପ୍ରଥମ ଥର ପାଇଁ ଆଇପିଏଲର କ୍ବାଲିଫାୟର -୧ ଖେଳିବାକୁ ଯାଉଛି।
ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୧୪ଟି ମ୍ୟାଚରୁ ୯ଟି ବିଜୟ, ୪ଟି ପରାଜୟ ଓ ଗୋଟିଏ ବାତିଲ ସହ ୧୯ପଏଣ୍ଟ ପାଇ ଟେବୁଲର ଦ୍ବିତୀୟ ସ୍ଥାନରେ ରହି କ୍ବାଲିଫାୟର-୧ ପାଇଁ ଯୋଗ୍ୟତା ହାସଲ କରିଛି। ବ୍ୟାଟିଂ ଅବା ବୋଲିଂ ଉଭୟ କ୍ଷେତ୍ରରେ ଦଳ ଭଲ ପ୍ରଦର୍ଶନ କରୁଛି। ବିଶେଷ କରି ବିରାଟ କୋହଲିଙ୍କ ଫର୍ମ ଦଳକୁ ଅଧିକ ଶକ୍ତିଶାଳୀ କରିଛି। ଦଳର ବ୍ୟାଟିଂ ଭାର କୋହଲିଙ୍କ ସମେତ ଫିଲ୍ ସଲ୍ଟ, ରଜତ ପଟିଦାର, ଜିତେଶ ଶର୍ମା, ଲିୟାମ ଲିଭିଙ୍ଗଷ୍ଟୋନ, ମୟଙ୍କ ଅଗ୍ରୱାଲ, ରୋମାରିଓ ସୈଫର୍ଟଙ୍କ ଉପରେ ନିର୍ଭର କରୁଛି। ବିରାଟ ୬୦୨, ଫିଲ୍ ସଲ୍ଟ ୩୩୧ରନ କରିଛନ୍ତି।ଦଳ ଶେଷ ମ୍ୟାଚରେ ଲକ୍ଷ୍ନୌ ସୁପରଜିଆଣ୍ଟ୍ସକୁ ୬ ୱିକେଟରେ ପରାସ୍ତ କରିଥିଲା। ଏକଦା ଲକ୍ଷ୍ନୌ ୨୨୭ରନ କରିଥିବାବେଳେ ବେଙ୍ଗାଲୁରୁ ୪ ୱିକେଟରେ ବିଜୟ ଲକ୍ଷ୍ୟ ହାସଲ କରିନେଇଥିଲା। ଜିତେଶ ଶର୍ମା ଅପରାଜିତ ୮୫ରନର ଇନିଂସ ଖେଳିଥିଲେ। ଏହାଛଡ଼ା ମୟଙ୍କ ଅଗ୍ରୱାଲ ମଧ୍ୟ ରନ କରିଥିଲେ।
