ଭାରତରେ ଶିଶୁ ଏବଂ କିଶୋରମାନଙ୍କ ପାଇଁ ସୋସିଆଲ ମିଡିଆ ବ୍ୟବହାର ଉପରେ ଏକ ବଡ଼ କଟକଣା
1 min read
ନୂଆଦିଲ୍ଲୀ: ଭାରତରେ ଶିଶୁ ଏବଂ କିଶୋରମାନଙ୍କ ପାଇଁ ସୋସିଆଲ ମିଡିଆ ବ୍ୟବହାର ଉପରେ ଏକ ବଡ଼ କଟକଣା ଆସିବାକୁ ଯାଉଛି। କୋମଳମତି ପିଲାଙ୍କ ମାନସିକ ସ୍ୱାସ୍ଥ୍ୟ ଏବଂ ସାଇବର ସୁରକ୍ଷାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏବେ ସୋସିଆଲ ମିଡିଆ ବ୍ୟବହାର ପାଇଁ ଏକ ନିର୍ଦ୍ଦିଷ୍ଟ ବୟସ ସୀମା ଧାର୍ଯ୍ୟ କରିବାକୁ ଯୋଜନା କରୁଛନ୍ତି।ଏଥିପାଇଁ ସରକାର ବିଭିନ୍ନ ଟେକ୍ କମ୍ପାନୀଗୁଡ଼ିକ ସହ ଆଲୋଚନା ଚଳାଇଛନ୍ତି।
ନୂଆଦିଲ୍ଲୀଠାରେ ଆୟୋଜିତ ‘ଇଣ୍ଡିଆ AI ଇମ୍ପାକ୍ଟ ସମିଟ୍’ ଅବସରରେ କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ପିଲାମାନଙ୍କୁ ଡିଜିଟାଲ୍ ଦୁନିଆର କୁପ୍ରଭାବରୁ ରକ୍ଷା କରିବା ପାଇଁ ବୟସ ସୀମା ନିର୍ଧାରଣ କରିବା ଅତ୍ୟନ୍ତ ଜରୁରୀ। ଏହାସହ ସୋସିଆଲ ମିଡିଆରେ ବଢ଼ୁଥିବା ‘ଡିପ୍ଫେକ୍’ ସମସ୍ୟାର ସମାଧାନ ପାଇଁ ମଧ୍ୟ ପ୍ଲାଟଫର୍ମଗୁଡ଼ିକ ସହ କଥାବାର୍ତ୍ତା ଜାରି ରହିଛି। ବିଶ୍ୱର ଅନେକ ଦେଶ ଏହି ନିୟମକୁ ଗ୍ରହଣ କରିସାରିଥିବା ବେଳେ ଭାରତ ମଧ୍ୟ ଏହି ଦିଗରେ ଆଗକୁ ବଢ଼ିବାକୁ ପ୍ରସ୍ତୁତ ହେଉଛି।
ଅଷ୍ଟ୍ରେଲିଆ ପ୍ରଥମ ଦେଶ ଭାବେ ୧୬ ବର୍ଷରୁ କମ୍ ଶିଶୁଙ୍କ ପାଇଁ ଫେସବୁକ୍, ଇନଷ୍ଟାଗ୍ରାମ୍ ଏବଂ ୟୁଟ୍ୟୁବ୍ ଭଳି ପ୍ଲାଟଫର୍ମକୁ ବ୍ୟାନ୍ କରିଛି। ସ୍ପେନ୍ ଏବଂ ୟୁରୋପୀୟ ସଂଘର ଅନ୍ୟ ଦେଶଗୁଡ଼ିକ ମଧ୍ୟ ସମାନ ନିୟମ ଉପରେ ବିଚାର କରୁଛନ୍ତି। ଆନ୍ଧ୍ରପ୍ରଦେଶ ସରକାର ମଧ୍ୟ ୧୬ ବର୍ଷରୁ କମ୍ ପିଲାଙ୍କ ପାଇଁ ସୋସିଆଲ ମିଡିଆ ବ୍ୟାନ୍ କରିବାକୁ ଯୋଜନା କରୁଛନ୍ତି।
ଭାରତରେ ଫେସବୁକ୍ ଓ ଇନଷ୍ଟାଗ୍ରାମର ୪୦୦ ମିଲିୟନରୁ ଅଧିକ ବ୍ୟବହାରକାରୀ ଅଛନ୍ତି, ଯାହା ବିଶ୍ୱରେ ସର୍ବାଧିକ। ଏଭଳି ପରିସ୍ଥିତିରେ ବୟସ ସୀମା ଲାଗୁ ହେଲେ ଏହି କମ୍ପାନୀଗୁଡ଼ିକ ଉପରେ ବଡ଼ ପ୍ରଭାବ ପଡ଼ିବ।
ଅନ୍ୟପଟେ, ସୋସିଆଲ ମିଡିଆ କମ୍ପାନୀଗୁଡ଼ିକ ଏହି ବ୍ୟାନ୍କୁ ବିରୋଧ କରିଛନ୍ତି। ସେମାନଙ୍କ କହିବା ଅନୁଯାୟୀ, ବୟସ ଯାଞ୍ଚ କରିବା ପ୍ରକ୍ରିୟା କଷ୍ଟକର ଏବଂ ଏହି ନିୟମ ଯୋଗୁଁ ବ୍ୟବହାରକାରୀମାନେ ଅନିୟନ୍ତ୍ରିତ କିମ୍ବା ଅସୁରକ୍ଷିତ ଆପ୍ ଆଡ଼କୁ ମୁହାଁଇପାରନ୍ତି।
ତଥାପି, ପିଲାମାନଙ୍କ ମାନସିକ ସ୍ୱାସ୍ଥ୍ୟ ଏବଂ ସାଇବର ସୁରକ୍ଷାକୁ ଦୃଷ୍ଟିରେ ରଖି କେନ୍ଦ୍ର ସରକାର ‘ଡିଜିଟାଲ ବ୍ୟକ୍ତିଗତ ଡାଟା ସୁରକ୍ଷା’ (DPDP) ଢାଞ୍ଚାରେ ଏହି ନୂତନ ନିୟମ ଆଣିବାକୁ ପ୍ରସ୍ତୁତି ଚଳାଇଛନ୍ତି।
