ଗଲ୍ଫ ଓଡ଼ିଆ ଆସୋସିଏସନର ଅଷ୍ଟମ ବାର୍ଷିକ ଉତ୍ସବ ପାଳନ

ଭୁବନେଶ୍ୱର : ରିଖ ଗଲ୍ଫ ଓଡ଼ିଆ ଆସୋସିଏସନ(ଗଓଆ) ର ଅଷ୍ଟମ ବାର୍ଷିକ ଉତ୍ସବ ଭୁବନେଶ୍ୱରଠାରେ ମହାସମାରୋହରେ ପାଳିତ ହୋଇଯାଇଛି। ଏହି ଉପଲକ୍ଷେ ଗଓଆ ତରଫରୁ ଆୟୋଜିତ ମହୋତ୍ସବରେ ମଧ୍ୟପ୍ରାଚ୍ୟସ୍ଥିତ ସାଉଦି ଆରବ, କାତାର, ଓମାନ, କୁଏତ, ବାହାରିନ, ୟୁଏଇ ଏବଂ ଆବୁଧାବିରେ ଅବସ୍ଥାପିତ ଶତାଧିକ ଗଓଆର ପ୍ରବାସୀ ଓଡ଼ିଆ ସଦସ୍ୟ, ସେମାନଙ୍କର ପରିବାରବର୍ଗ ଓ ସମ୍ପର୍କୀୟ ମାନଙ୍କ ସହିତ ଆସି ଯୋଗ ଦେଇଥିଲେ। ବିଶେଷକରି ବାର୍ଷିକ ଉତ୍ସବକୁ କେନ୍ଦ୍ରକରି ଗଓଆର ସଦସ୍ୟ ଓ ଶୁଭେଚ୍ଛୁ ମାନଙ୍କ ମଧ୍ୟରେ ପ୍ରବଳ ଆନନ୍ଦ, ଉତ୍ସାହ, ଉଲ୍ଲାସ ଏବଂ ଉନ୍ମାଦନା ଦେଖିବାକୁ ମିଳିଥିଲା। ପ୍ରାରମ୍ଭରେ ଗଓଆର ସଭାପତି ଅଜୟ କୁମାର ଦାସ, ଆଗନ୍ତୁକ ପ୍ରତିନିଧି ମାନଙ୍କୁ ସ୍ଵାଗତ ସମ୍ଭାଷଣ ଜଣାଇଥିଲେ। ‘ ସେବା ହିଁ ସର୍ବୋପରି ‘ ଶୀର୍ଷକ ଲକ୍ଷ୍ୟକୁ ଆଧାରକରି ଗଓଆ ଗତ ଆଠ ବର୍ଷ ଧରି ମଧ୍ୟପ୍ରାଚ୍ୟର ରାଷ୍ଟ୍ର ଗୁଡିକରେ ଓଡ଼ିଶାର ମହାନ ସାମାଜିକ ଓ ସାଂସ୍କୃତିକ ଐତିହ୍ୟକୁ ପ୍ରଚାର ଓ ପ୍ରସାର କରିଆସୁଥିବା ଦାସ ଦର୍ଶାଇଥିଲେ। ଗଓଆର ସାଧାରଣ ସମ୍ପାଦକ ପ୍ୟାରୀ ମୋହନ ମଲ୍ଲିକ ମାତୃ ପ୍ରଦେଶ ଓଡ଼ିଶାର ସାମଗ୍ରିକ ବିକାଶ ନେଇ ଗଓଆର ମହତ୍ ଉଦ୍ଦେଶ୍ୟ ଓ ସ୍ଥିରିକୃତ ଭବିଷ୍ୟତ ମାର୍ଗପନ୍ଥା ସଂପର୍କରେ ସୂଚନା ଦେଇଥିଲେ। ଗଓଆର ବିଭିନ୍ନ କାର୍ଯ୍ୟକ୍ରମରେ ସଦାସର୍ବଦା ସମର୍ଥନ ଯୋଗାଇ ଆସୁଥିବାରୁ, ଏହି ଅବସରରରେ ଆଇ.ସି.ଆଇ.ସି.ଆଇ, ଆଇ.ଡି.ଏଫ.ସି ବ୍ୟାଙ୍କ ଏବଂ ସୂର୍ଯ୍ୟ ଉଦ୍ୟୋଗ ର ପ୍ରତିନିଧିଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଓଡିଶା ପରିବାର ବିଭାଗର ଓ.ଏସ.ଡି. ପ୍ରୀତିଶ ପଣ୍ଡା ଓ ତାଙ୍କର ସହକର୍ମୀ ନୃସିଂହ ସାହୁଙ୍କୁ ସେମାନଙ୍କର ଆଁକୁଣ୍ଠ ସାହାଯ୍ୟ ଓ ସହଯୋଗ ପାଇଁ ସ୍ୱତନ୍ତ୍ର ଭାବରେ ବଧାଇ ଜଣାଯାଇଥିଲା । ସଭାକୁ ସମ୍ବୋଧନ କରି ମୁଖ୍ୟ ଅତିଥି ପ୍ରଖ୍ୟାତ ଚିତ୍ର ତାରକା ପ୍ରଶାନ୍ତ ନନ୍ଦ, ଗଓଆର ସଦସ୍ୟ ମାନଙ୍କୁ ମା, ମାଟି, ମାତୃଭାଷା ଏବଂ ଆମର ଇଷ୍ଟଦେବତା ଓ ପରିଚୟ ମହାପ୍ରଭୁ ଜଗନ୍ନାଥ ଙ୍କୁ କେବେ ନଭୁଲିଵାକୁ ନିବେଦନ କରିଥିଲେ। ସମ୍ମାନନୀୟ ଅତିଥି ୱାର୍ଲଡ୍ ଓଡ଼ିଶା ସୋସାଇଟିର ଅଧ୍ୟକ୍ଷ କିଶୋର ଦ୍ବିବେଦୀ, ଓଡ଼ିଶାର ସ୍ୱାସ୍ଥ୍ୟ, ଶିକ୍ଷା ଏବଂ ପରିମଳ କ୍ଷେତ୍ରରେ ସହାୟତା ଯୋଗାଇ ଦେବା ନେଇ ସଭାପତି ଅଜୟ କୁମାର ଦାସଙ୍କର ସକ୍ରୀୟ ନେତୃତ୍ୱରେ ଗଓଆ ଟିମର ସାଧୁଉଦ୍ୟମକୁ ଭୂରୀଭୂରୀ ପ୍ରଶଂସା କରିଥିଲେ।
ଗଓଆର ବାର୍ଷିକ ଉତ୍ସବର ମୁଖ୍ୟ ଆକର୍ଷଣ ଏକ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ଥିଲା। ପ୍ରତିଭା ସମ୍ପନ୍ନ ଓ ଉଦୀୟମାନ ଓଡ଼ିଶୀ ତଥା ସମ୍ବଲପୁରୀ ଲୋକ ନୃତ୍ୟାଙ୍ଗନା ମାନେ ସେମାନଙ୍କର ଅପୂର୍ବ କଳାଚାତୁର୍ଯ୍ୟ ରେ ଦର୍ଶକ ମାନଙ୍କର ଭରପୁର ମନୋରଞ୍ଜନ କରିଥିଲେ ।ବିଶିଷ୍ଟ କଣ୍ଠଶିଳ୍ପୀ ସୁସ୍ମିତା ଦାସ,ଶ୍ରୀକର ପ୍ରସାଦ ପାଢ଼ୀ ଏବଂ ଗଓଆର ସାଂସ୍କୃତିକ ରାଜଦୂତ ଅନିନ୍ଦିତା ଦାସ ଙ୍କର ସୁମଧୁର ଓ ସୁଲଳିତ ସଙ୍ଗୀତ ଗାୟନ ମଧ୍ୟ ଶ୍ରୋତା ମାନଙ୍କ ଦ୍ୱାରା ଖୁବ ଆଦୃତ ହୋଇଥିଲା। ସୁଦକ୍ଷ ଉପସ୍ଥାପିକା ସୁଶ୍ରୀ ତନ୍ମୟୀ ସମସ୍ତ କାର୍ଯ୍ୟକ୍ରମକୁ ସୂଚାରୁ ରୂପେ ସଂଯୋଜନା କରିଥିଲେ। ଉପସ୍ଥିତ ମାନ୍ୟଗଣ୍ୟ ବ୍ୟକ୍ତି ମାନଙ୍କ ମଧ୍ୟରେ ଦେବର୍ଷି ମଲ୍ଲିକ, ରାମ କୃଷ୍ଣ ଦାଶ, କାବେରୀ ବେହେରା, ଗିରିଧାରୀ ନାୟକ, ମନସ୍ମିତା ଜେନା ନାୟକ ଓ ବାସୁଦେବ ଜେନା ପ୍ରମୁଖ ଅନ୍ତର୍ଭୁକ୍ତ ଥିଲେ । ବାର୍ଷିକ ଉତ୍ସବର ସମଗ୍ର ଆୟୋଜନକୁ ଦକ୍ଷତାର ସହିତ ପରିଚାଳନା ଓ ସଫଳ କାର୍ଯ୍ୟାନ୍ଵୟନ କରିବାରେ ଗଓଆର ଅଗ୍ରଣୀ ସଂଗଠକ ମଣ୍ଡଳୀ ଯଥା ଅଜୟ କୁମାର ଦାସ, ପ୍ୟାରୀ ମୋହନ ମଲ୍ଲିକ, ବିଦ୍ୟା ଭୂଷଣ ମହାନ୍ତି, ବନବିହାରୀ ମହାନ୍ତି, ଅଜିତ ଜେନା, ଜୟନ୍ତ ମହାପାତ୍ର, ମୁସ୍ତାଫା ବେଗ, ଦେବାଶିଷ ରାଉତ, ସୁସ୍ମିତା ପଟନାୟକ, ବଦ୍ରି ନାରାୟଣ ସୁବୁଦ୍ଧି, ନିହାର ମହାନ୍ତି, ରାମ ଚନ୍ଦ୍ର ସାହୁ ଓ ପ୍ରତାପ ନାୟକ ପ୍ରମୁଖ ପ୍ରଭାବଶାଳୀ ଭୂମିକା ନିର୍ବାହ କରିଥିଲେ।