ଆସାମରେ ଗତ ୪ ଦିନ ଧରି ଲଗାଣ ବର୍ଷା

ଆସାମ: ଆସାମର ସ୍ଥିତି ସଙ୍ଗୀନ ହୋଇଛି । ଜଳରେ ଘର ଦ୍ବାର, ରାସ୍ତା ଘାଟ ସବୁ ବୁଡି ରହିଛି । ରାସ୍ତା ବନ୍ୟା ଜଳରେ ନଈ ପାଲଟି ଯାଇଛି । ବିଲମାଳ ସମୁଦ୍ର ପରି ସବୁ ଦିଶୁଛି । ରାସ୍ତା ଉପରେ ଗାଡି ମଟର ଅଟକି ରହିଛି । ପାଣିର ପ୍ରଖର ସୁଅ ରାସ୍ତାରେ ଚାଲୁଥିବାରୁ ଯାତାୟାତ ଠପ୍ ଅଛି । ତେବେ ବନ୍ୟାର ଭୟଙ୍କର ରୂପ ଆସାମରୁ ଆସିଛି । ଯାହା ଆକାଶ ମାର୍ଗକୁ ନିଆଯାଇଥିବା ଚିତ୍ରରେ କଏଦ ହୋଇଛି ।

ଉତ୍ତର-ପୂର୍ବ ରାଜ୍ୟରେ ଗତ ୪ ଦିନ ଧରି ଲଗାଣ ବର୍ଷା ବିତ୍ପାତ ଯୋଗୁଁ ଆସାମ, ସିକ୍କିମ୍‌, ଅରୁଣାଚଳ ପ୍ରଦେଶ, ତ୍ରିପୁରା ଓ ମଣିପୁର ଆଦି ରାଜ୍ୟରେ ପ୍ରାକୃତିକ ଦୁର୍ବିପାକ ଲାଗି ରହିଛି । ଲଗାଣ ବର୍ଷା ଯୋଗୁଁ ଆସାମରେ ଭୟଙ୍କର ସ୍ଥିତି ଉପୁଜିଛି ଆଉ ଜଳ ପ୍ରଳୟ ଆସିଛି ।

୨୨ ଜିଲ୍ଲାର ୧୨୫୪ଟି ଗାଁର ପ୍ରାୟ ସାଢ଼େ ୫ ଲକ୍ଷ ଲୋକ ବନ୍ୟା ଦ୍ବାରା ପ୍ରଭାବିତ ହୋଇଛନ୍ତି । ଘର ଦ୍ବାର ସବୁଠି ପାଣି, ପୂରା ପାଣି ଘେରରେ । ଜଳବନ୍ଦୀରେ ଥିବା ଲୋକଙ୍କୁ ସୁରକ୍ଷିତ ସ୍ଥାନକୁ ଉଦ୍ଧାର କରାଯାଉଛି । ବର୍ଷା ସହ ଭୂସ୍ଖଳନ ପାଇଁ ଇତିମଧ୍ଯରେ ଆସାମରେ ୧୧ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।