ଅଯୋଧ୍ୟାର ରାମ ମନ୍ଦିରକୁ ଆସିଥିବା ଦାନ ଅର୍ଥ ଚୋରି ଅଭିଯୋଗ ମାମଲା

ନୂଆଦିଲ୍ଲୀ: ଅଯୋଧ୍ୟାର ରାମ ମନ୍ଦିରକୁ ଆସିଥିବା ଦାନ ଅର୍ଥ ଚୋରି ଅଭିଯୋଗ ମାମଲାରେ ତଦନ୍ତ ଉପରେ ତଦାରଖ ବନ୍ଦ କରିଛନ୍ତି ସୁପ୍ରିମକୋର୍ଟ। ଉତ୍ତରପ୍ରଦେଶ ସରକାରଙ୍କ ପକ୍ଷରୁ ୮ ଜଣ ଅଭିଯୁକ୍ତଙ୍କ ବିରୋଧରେ ଅଭିଯୋଗପତ୍ର ଦାଖଲ ହୋଇଥିବା ସୂଚନା ମିଳିବା ପରେ ସୋମବାର ଏହି ନିଷ୍ପତ୍ତି ନେଇଛନ୍ତି ସର୍ବୋଚ୍ଚ ଅଦାଲତ।

ସୁପ୍ରିମକୋର୍ଟ ପ୍ରଧାନ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଓ ଭି ମୋହନାଙ୍କ ଦ୍ୱାରା ଗଠିତ ଖଣ୍ଡପୀଠ ଆଇନ ଅନୁଯାୟୀ ମାମଲା ଆଗକୁ ବଢ଼ାଇବାକୁ ବିଚାର ବିଭାଗୀୟ ମାଜିଷ୍ଟ୍ରେଟଙ୍କୁ ନିର୍ଦ୍ଦେଶ ଦେଇଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ, ସୁପ୍ରିମକୋର୍ଟଙ୍କ ନିର୍ଦ୍ଦେଶ କୌଣସି ପକ୍ଷଙ୍କୁ ପକ୍ଷପାତ କରିବା ଉଚିତ୍ ନୁହେଁ କାରଣ ଏହା ଅଭିଯୋଗର ଯୋଗ୍ୟତା ଉପରେ କୌଣସି ମତ ପ୍ରକାଶ କରିନାହିଁ।

୮ ଜଣ କର୍ମଚାରୀ ଗିରଫ
ତଦନ୍ତକାରୀ ଦଳ ମନ୍ଦିର ପରିସରରେ ଦାନ ଟଙ୍କା ଗଣତି ସମୟରେ ୧୦୫ଟି ସ୍ଥାନରେ ଅନଧିକୃତ ଭାବେ ଟଙ୍କା ଚୋରି ହେବା ଘଟଣା ଚିହ୍ନଟ କରିଥିବା ସରକାର ଅଦାଲତଙ୍କୁ ଜଣାଇଛନ୍ତି। ସେପ୍ଟେମ୍ବରରେ ଅଯୋଧ୍ୟାର ଦୁର୍ନୀତି ନିରୋଧୀ ଅଦାଲତରେ ୬୦ ହଜାରରୁ ଅଧିକ ପୃଷ୍ଠାର ଅଭିଯୋଗପତ୍ର ଦାଖଲ ହୋଇଛି। ତଦନ୍ତରେ ୧୭୩ ଜଣ ସାକ୍ଷୀଙ୍କ ବୟାନ ନିଆଯାଇଛି। ମନ୍ଦିରର ଦାନ ଅର୍ଥ ଓ ମୂଲ୍ୟବାନ ସାମଗ୍ରୀର ହିସାବ ମଧ୍ୟ ଯାଞ୍ଚ କରାଯାଇଛି। ଜୁନ୍‌ ୭ରେ ମନ୍ଦିରରୁ ୫ ରୁ ୭.୫ କୋଟି ଟଙ୍କାର ଦାନ ଅର୍ଥ ହଡ଼ପ ଅଭିଯୋଗ ଉଠିଥିଲା। ଜୁନ୍‌ ୨୬ରେ ଦାନ ଟଙ୍କା ପରିଚାଳନା ସହ ଜଡ଼ିତ ୮ ଜଣ କର୍ମଚାରୀ ଗିରଫ ହୋଇଥିଲେ।