ଗୁଣ୍ଡା ଆଇନ’କୁ ନେଇ ଉତ୍ତର ପ୍ରଦେଶ ସରକାରଙ୍କୁ ଆହ୍ଲାବାଦ ହାଇକୋର୍ଟଙ୍କ ତୀବ୍ର ଭର୍ତ୍ସନା

ଲକ୍ଷ୍ନୌ: ଆହ୍ଲାବାଦ ହାଇକୋର୍ଟ ରାଜ୍ୟରେ ‘ଗୁଣ୍ଡା ଆଇନ’କୁ ନେଇ ଉତ୍ତର ପ୍ରଦେଶ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। କୋର୍ଟ କହିଛନ୍ତି ଯେ, ତାଙ୍କ ସମ୍ମୁଖରେ ଥିବା ମାମଲାଗୁଡ଼ିକ ସୂଚାଇ ଦେଉଛି ଯେ, ରାଜ୍ୟ ସରକାର ଏହି କଠୋର ଆଇନକୁ ଲୋକଙ୍କୁ ହଇରାଣ କରିବା ପାଇଁ ଏକ ଅସ୍ତ୍ର ଭାବରେ ବ୍ୟବହାର କରିବାକୁ ସଙ୍କଳ୍ପବଦ୍ଧ।

ଆହ୍ଲାବାଦ ହାଇକୋର୍ଟଙ୍କ ଲକ୍ଷ୍ନୌ ବେଞ୍ଚର ବିଚାରପତି ସୁଭାଷ ବିଦ୍ୟାର୍ଥୀ କହିଛନ୍ତି ଯେ, ଗୁଣ୍ଡା ଆଇନ ଏକ ଅତ୍ୟନ୍ତ କଠୋର ଆଇନ ଓ ଏହାକୁ ଅତ୍ୟନ୍ତ ସତର୍କତାର ସହିତ କେବଳ ସ୍ପଷ୍ଟ ମାମଲାରେ ଓ ଆଇନ ଶୃଙ୍ଖଳା ବଜାୟ ରଖିବା ପାଇଁ କାର୍ଯ୍ୟକାରୀ କରିବା ଉଚିତ୍‌। ଜାହିଦ ଅଲ୍ଲିଙ୍କୁ ‘ଗୁଣ୍ଡା’ ଘୋଷଣା କରି ଛଅ ମାସ ପାଇଁ ନିର୍ବାସନ ନିର୍ଦ୍ଦେଶ ଦେଇଥିବା ଗୋଣ୍ଡା ଜିଲ୍ଲା ମାଜିଷ୍ଟ୍ରେଟ (ଡିଏମ୍)ଙ୍କ ଆଦେଶକୁ ଖାରଜ କରି ହାଇକୋର୍ଟ ଏହି ପର୍ଯ୍ୟବେକ୍ଷଣ କରିଛନ୍ତି। ଡିଭିଜନାଲ କମିଶନରଙ୍କ ଆଦେଶକୁ ମଧ୍ୟ କୋର୍ଟ ଖାରଜ କରିଦେଇଛନ୍ତି ଯେଉଁଥିରେ ଡିଭିଜନାଲ କମିଶନର ଡିଏମ୍‌ (ଜିଲ୍ଲା ମାଜିଷ୍ଟ୍ରେଟ୍)ଙ୍କ ନିଷ୍ପତ୍ତିକୁ ସମର୍ଥନ କରିଥିଲେ।ଗୋଣ୍ଡା ଜିଲ୍ଲା ମାଜିଷ୍ଟ୍ରେଟ୍ ମେ ୧୧ ତାରିଖରେ ଦୁଇଟି ଫୌଜଦାରୀ ମାମଲା ଓ ଏକ ବିଟ୍ ସୂଚନା ରିପୋର୍ଟ ଉପରେ ନିର୍ଭର କରି ଗୁଣ୍ଡା ଆଇନର ଧାରା ୩(୧) ଅନୁଯାୟୀ ଏହି ନିର୍ଦ୍ଦେଶ ଦେଇଥିଲେ। ଗୋଟିଏ ଅପରାଧିକ ମାମଲା ୨୦୧୦ରୁ ଓ ଅନ୍ୟଟି ୨୦୨୦। ୨୦୧୦ ମାମଲାରେ ଅଲ୍ଲିିଙ୍କୁ ଅଗଷ୍ଟ ୨୬ , ୨୦୧୭ରେ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ଦୋଷମୁକ୍ତ କରିସାରିଛନ୍ତି ବୋଲି କୋର୍ଟ କହିଛନ୍ତି।

କୋର୍ଟ କହିଛନ୍ତି ଯେ, ଯେଉଁ ମାମଲାରେ ଜଣେ ବ୍ୟକ୍ତି ପୂର୍ବରୁ ଦୋଷମୁକ୍ତ ହୋଇସାରିଛନ୍ତି, ତାହାକୁ ପରବର୍ତ୍ତୀ ସମୟରେ ତାଙ୍କୁ ଗୁଣ୍ଡା ଘୋଷଣା କରିବା ପାଇଁ ଆଧାର ଭାବରେ ବ୍ୟବହାର କରାଯାଇପାରିବ ନାହିଁ। କୋର୍ଟ ଆହୁରି କହିଛନ୍ତି, ୨୦୨୦ରେ ଫୌଜଦାରୀ ମାମଲା ରୁଜୁ ହେବା ଓ ୨୦୨୬ରେ ଅଲିଙ୍କୁ ଗୁଣ୍ଡା ଘୋଷଣା କରାଯାଇଥିବା ଆଦେଶ ମଧ୍ୟରେ ପ୍ରାୟ ଛଅ ବର୍ଷର ବ୍ୟବଧାନ ଥିଲା। କୋର୍ଟ କହିଛନ୍ତି ଯେ, ଉଭୟଙ୍କ ମଧ୍ୟରେ କୌଣସି ଯୁକ୍ତିଯୁକ୍ତ ସମ୍ପର୍କ ସ୍ଥାପନ କରାଯାଇପାରିବ ନାହିଁ। ‌କୋର୍ଟ ଆହୁରି କହିଛନ୍ତି ଯେ, ୨୦୨୦ରେ ଏକ ଫୌଜଦାରୀ ମାମଲାରେ ସମ୍ପୃକ୍ତି ଏହା ପ୍ରମାଣିତ କରିପାରିବ ନାହିଁ ଯେ, ଅଲ୍ଲୀ ଜଣେ ଅଭ୍ୟାସଗତ ଅପରାଧୀ।

ଖଣ୍ଡପୀଠ ଗୁଣ୍ଡା ଆଇନକୁ କାର୍ଯ୍ୟକାରୀ କରିବା ପାଇଁ ବିଟ୍ ସୂଚନା ରିପୋର୍ଟକୁ ବୈଧ ଆଧାର ଭାବରେ ଗ୍ରହଣ କରିବାକୁ ମଧ୍ୟ ମନା କରିଦେଇଥିଲେ। କୋର୍ଟ ଆହୁରି ମଧ୍ୟ କହିଛନ୍ତି ଯେ, କମିଶନର ନିର୍ଦ୍ଦୋଷ ମାମଲାକୁ ଅଲ୍ଲିଙ୍କ ବିରୋଧରେ ଏକ ବିଚାରାଧୀନ ମାମଲା ଭାବରେ ବ୍ୟବହାର କରିଥିଲେ। ଡିଏମ୍‌ ଏବଂ କମିଶନର ଉଭୟଙ୍କ ଦ୍ୱାରା ଦିଆଯାଇଥିବା ଆଦେଶ ଆଇନଗତ ଭାବରେ ସ୍ଥାୟୀ ନୁହେଁ ବୋଲି ଦର୍ଶାଇ ଉଚ୍ଚ ନ୍ୟାୟାଳୟ ସେଗୁଡ଼ିକୁ ରଦ୍ଦ କରିଦେଇଥିଲେ ଓ ଅଲ୍ଲିଙ୍କ ଆବେଦନକୁ ମଞ୍ଜୁର କରିଥିଲେ।