ପରୀକ୍ଷା ଦେବା ପାଇଁ ଯାଉଥିବା ୨ ଜଣ ଛାତ୍ରୀଙ୍କର ବାଇକ ଦୁର୍ଘଟଣା

ବାହାନଗା, ୨୩।୨ : ବାଲେଶ୍ୱର ଜିଲା ବାହାନଗା ବ୍ଲକ ବିଷ୍ଣୁପୁର ଉଚ୍ଚ ବିଦ୍ୟାଳୟର ପରୀକ୍ଷା କେନ୍ଦ୍ରକୁ ପରୀକ୍ଷା ଦେବା ପାଇଁ ଯାଉଥିବା ୨ ଜଣ ଛାତ୍ରୀଙ୍କର ବାଇକ ଦୁର୍ଘଟଣା ଘଟିଛି। ଗୁରୁତର ହୋଇ ଚିକିତ୍ସା୍ୟାଳୟରେ ଚିକିତ୍ସିତ ହେଉଛନ୍ତି। ସୋମବାର ମାଟ୍ରିକ ପରୀକ୍ଷାର ତୃତୀୟ ଦିନ ଥିଲା। ତୃତୀୟ ଦିନରେ ତୃତୀୟ ଭାଷା ହିନ୍ଦି ଓ ସଂସ୍କୃତ ବିଭାଗ ପରୀକ୍ଷା ଥିଲା। ଏହି ପରୀକ୍ଷା ଦେବାପାଇଁ ଅଭଣା ହାଇସ୍କୁଲର ଛାତ୍ରୀ ତଥା ସେହି ଗ୍ରାମର ଚକ୍ରଧର ମାଝୀଙ୍କ ଝିଅ ଜ୍ୟୋତି ପ୍ରଭା ମାଝୀ ଓ ଦାଶରଥି ମାଝୀଙ୍କ ଝିଅ ମମତା ମାଝୀ ଉଭୟ ନିଜର ସାଇକେଲ ଯୋଗେ ଘରୁ ବିଷ୍ଣୁପୁର ହାଇସ୍କୁଲ ପରୀକ୍ଷା କେନ୍ଦ୍ରକୁ ପରୀକ୍ଷା ଦେବାପାଇଁ ଆସୁଥିଲେ। ସେହି ସମୟରେ ବିପରୀତ ଦିଗରୁ ଏକ ପଲସର ବାଇକ ଯୋଗେ ୩ ଜଣ ଯୁବକ ବେପାରୁଆ ବାଇକ ଚଳାଇ ୨ ଜଣ ପରୀକ୍ଷାର୍ଥୀଙ୍କ ସାଇକେଲକୁ ଧକ୍କା ଦେଇଥିଲେ। ଫଳରେ ବାଇକ ଧକ୍କାରେ ୨ ମାଟ୍ରିକ ପରୀକ୍ଷାର୍ଥୀ ୨ ଜଣ ଗୁରୁତର ହେବା ସହିତ ଛାତ୍ରୀ ଜ୍ୟୋତି ପ୍ରଭାଙ୍କ ଦୁର୍ଘଟଣାରେ ଡାହାଣ ପାପୁଲିରେ ଗୋଟିଏ ଆଙ୍ଗୁଳି କଟି ଛିଡି ପଡ଼ିଥିବାବେଳେ ଅନ୍ୟଜଣେ ଛାତ୍ରୀ ମମତାଙ୍କ ଗୋଡ଼ ଭାଙ୍ଗିଯାଇଛି। ଉଭୟ ଗୁରୁତର ହୋଇ ପ୍ରଥମେ ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ। ମମତାଙ୍କ ଅବସ୍ଥା ଗୁରୁତର ହେବାରୁ ଉଭୟଙ୍କୁ ବାଲେଶ୍ୱର ଫକୀରମୋହନ ମେଡିକାଲ କକେଜକୁ ସ୍ଥାନାନ୍ତରିତ କରାଯାଇଛି। ବେପାରୁଆ ବାଇକ ଚାଳକ ପାଇଁ ଉଭୟ ଛାତ୍ରୀ ମାଟ୍ରିକ ପରୀକ୍ଷାରୁ ବଞ୍ଚିତ ହୋଇଛନ୍ତି।