ନିଯୁକ୍ତ ହେବେ ୭୦,୦୦୦ CISF ଯବାନ
1 min read
ନୂଆଦିଲ୍ଲୀ: ଭାରତର ଅର୍ଥନୈତିକ ଉନ୍ନତିକୁ ସମର୍ଥନ କରିବା ଓ ସୁରକ୍ଷା ବ୍ୟବସ୍ଥା ମଜବୁତ କରିବା ଲାଗି ଗୃହ ମନ୍ତ୍ରଣାଳୟ (ଏମଏଚଏ) ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଫୋର୍ସ (ସିଆଇଏସଏଫ)ର ସଂଖ୍ୟା ୧.୬୨ ଲକ୍ଷରୁ ବୃଦ୍ଧି କରି ୨.୨ ଲକ୍ଷକୁ ଅନୁମୋଦନ କରିଛି। ଆଗାମୀ ପାଞ୍ଚ ବର୍ଷରେ ପ୍ରତିବର୍ଷ ୧୪,୦୦୦ ନୂଆ କର୍ମଚାରୀ ନିଯୁକ୍ତି ଦେଇ ମୋଟ ୫୮,୦୦୦ ନିଯୁକ୍ତି ସୁନିଶ୍ଚିତ କରାଯିବ, ଯାହା ନୂଆ ରୋଜଗାର ସୁଯୋଗ ସୃଷ୍ଟି କରିବ।
୨୦୨୪ରେ ୧୩,୨୩୦ ଜଣଙ୍କୁ ନିଯୁକ୍ତି ଦିଆଯାଇଥିବା ବେଳେ ୨୦୨୫ରେ ୨୪,୦୯୮ ଜଣଙ୍କ ନିଯୁକ୍ତି ପ୍ରକ୍ରିୟା ଚାଲିଛି। ଏହି ନିଯୁକ୍ତି ଅଭିଯାନ ମହିଳା ପ୍ରାର୍ଥୀଙ୍କୁ ଆକର୍ଷିତ କରିବା ସହ ସିଆଇଏସଏଫରେ ମହିଳା ପ୍ରାତିନିଧ୍ୟ ବୃଦ୍ଧି ପାଇଁ ଉଦ୍ୟମ କରୁଛି। ଏହା ସହ ଏକ ଅତିରିକ୍ତ ବାଟାଲିୟନ ଗଠନ କରାଯିବ, ଯାହା ଆଭ୍ୟନ୍ତରୀଣ ସୁରକ୍ଷା ଓ ଜରୁରୀ ପରିସ୍ଥିତିରେ ସହାୟକ ହେବ।
ଏହି ସଂଖ୍ୟା ବୃଦ୍ଧି ବିମାନବନ୍ଦର, ବନ୍ଦର, ତାପଜଳ ବିଦ୍ୟୁତ କେନ୍ଦ୍ର, ପରମାଣୁ ସଂସ୍ଥାନ ଓ ଜମ୍ମୁ-କାଶ୍ମୀରର ଜେଲ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ସିଆଇଏସଏଫର ସୁରକ୍ଷା ମୁତୟନକୁ ମଜବୁତ କରିବ। ଛତିଶଗଡ଼ ଭଳି ରାଜ୍ୟରେ ବାମପନ୍ଥୀ ଚରମପନ୍ଥା (ଏଲଡବ୍ଲୁଇ) ହ୍ରାସ ପାଇବା ସହ ନୂଆ ଶିଳ୍ପ କ୍ଷେତ୍ର ଉଭା ହେବାର ସମ୍ଭାବନା ଥିବାରୁ ଏହି ସଂଖ୍ୟା ବୃଦ୍ଧି ଆବଶ୍ୟକ ହୋଇପଡ଼ିଛି।
ଗତ ବର୍ଷ ସିଆଇଏସଏଫ ସଂସଦ ଭବନ, ଅଯୋଧ୍ୟା ବିମାନବନ୍ଦର, ହଜାରୀବାଗରେ ଏନଟିପିସି କୋଇଲା ଖଣି ଓ ପୁଣେରେ ଆଇସିଏମଆର ଭଳି ସାତଟି ନୂଆ ସ୍ଥାନରେ ମୁତୟନ ହୋଇଛି। ଏହି ବିସ୍ତାର ଭାରତର ଅଗ୍ରଗତି ସହ ଜାତୀୟ ସମ୍ପଦର ସୁରକ୍ଷା ପାଇଁ ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି।
