ଓଡ଼ିଶାରେ ଖୋଲିବ ୩୮ଟି ମଡେଲ ମଣ୍ଡି

ଭୁବନେଶ୍ୱର : ରାଜ୍ୟ କ୍ୟାବିନେଟରେ ୭ଟି ପ୍ରସ୍ତାବକୁ ମଞ୍ଜୁରୀ ମିଳିଛି। ବୁଧବାର ଦିନ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟର ଗୁରୁତ୍ଵପୂର୍ଣ୍ଣ ବୈଠକରେ ୬ଟି ବିଭାଗର ୭ଟି ପ୍ରସ୍ତାବକୁ ଅନୁମୋଦନ ଦେଇଛନ୍ତି ରାଜ୍ୟ ସରକାର। ଏନେଇ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ମନୋଜ ଆହୁଜା ସୂଚନା ଦେଇଛନ୍ତି।

ଧାନ ମଣ୍ଡିଗୁଡ଼ିକରେ ଚାଷୀମାନଙ୍କୁ ସମସ୍ତ ସୁବିଧା ଦେବା ସହ ଚାଷୀ, ବ୍ୟବସାୟୀ ଏବଂ ଅନ୍ୟ ଭାଗିଦାରୀମାନଙ୍କୁ କାରବାର ସୁବିଧା ଯୋଗାଇବା ଲାଗି ରାଜ୍ୟରେ ସ୍ଥାପନ ହେବ ମଡେଲ ମଣ୍ଡି। ପ୍ରଥମ ପର୍ଯ୍ୟାୟରେ ରାଜ୍ୟରେ ୩୮ଟି ମଡେଲ ମଣ୍ଡି ସ୍ଥାପନ କରିବାକୁ ନିଷ୍ପତ୍ତି ହୋଇଛି। ଏଥିପାଇଁ ବ୍ୟୟ ହେବ ୩୦୦ କୋଟି ଟଙ୍କା। ଆସନ୍ତା ଦୁଇ ବର୍ଷ ମଧ୍ୟରେ ଏହି ମଣ୍ଡି ସ୍ଥାପନ ପାଇଁ ଲକ୍ଷ୍ୟ ରହିଛି।

ସେହିପରି ଭୁବନେଶ୍ଵର ବିମାନବନ୍ଦରରେ ‘ଏମଆରଓ’ ସ୍ଥାପନ ପ୍ରସ୍ତବକୁ ରାଜ୍ୟ ସରକାରଙ୍କ ମଞ୍ଜୁରୀ ମିଳିଛି। ଓଡ଼ିଶାକୁ ପୂର୍ବ ଭାରତର ବିମାନ ଚଳାଚଳ କ୍ଷେତ୍ରରେ ଏକ ପ୍ରମୁଖ କେନ୍ଦ୍ର କରିବା ନିମନ୍ତେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ଗୋଟିଏ ଆଧୁନିକ ମେଣ୍ଟେନାନ୍ସ, ରିପେୟାର ଆଣ୍ଡ ଓଭରହାଉଲ (ଏମଆରଓ) କେନ୍ଦ୍ର ସ୍ଥାପନ ପାଇଁ ଅନୁମୋଦନ ମିଳିଛି।

ଏହା ସହ ପାନୀୟ ଜଳ ଯୋଗାଣ ଟେଣ୍ଡର ଏବଂ ଏଲଇଡି ଲଗାଇବା ପାଇଁ ପାଣ୍ଠିକୁ ଅନୁମୋଦନ ମିଳିଛି। ସମ୍ବଲପୁର, ହୀରାକୁଦ ଓ ବୁର୍ଲା ସହରରେ ୨୪ ଘଣ୍ଟିଆ ପାନୀୟ ଜଳ ଯୋଗାଣ ପ୍ରକଳ୍ପ ପ୍ରସ୍ତାବକୁ ମଞ୍ଜୁରୀ ଦେଇଛନ୍ତି ରାଜ୍ୟ ସରକାର। ୩୮୨.୪୦ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ କାର୍ଯ୍ୟକାରୀ ହେବ। ଏଥିରେ ୧୧୦ ଏମଏଲଡି କ୍ଷମତା ବିଶିଷ୍ଟ ଏକ ଜଳ ଗ୍ରହଣ କୂଅ ଏବଂ ୬୫ ଏମଏଲଡି ଓ ୩୫ ଏମଏଲଡି କ୍ଷମତା ବିଶିଷ୍ଟ ଦୁଇଟି ଜଳ ବିଶୁଦ୍ଧିକରଣ କେନ୍ଦ୍ର ନିର୍ମାଣ ହେବ। ଏହି କାମ ଆସନ୍ତା ସେପ୍ଟେମ୍ବର ୧ରୁ ଆରମ୍ଭ ହୋଇ ୨୦୨୭ ଅଗଷ୍ଟ ୩୧ ସୁଦ୍ଧା ଶେଷ କରିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି।

୧୧୦ଟି ସହରାଞ୍ଚଳରେ ଏଲଇଡି ରାସ୍ତା ଆଲୋକ ପ୍ରକଳ୍ପ ପାଇଁ ଓଡ଼ିଶା ନଗର ଭିତ୍ତିଭୂମି ଉନ୍ନୟନ ପାଣ୍ଠିରୁ ୨୦୦ କୋଟି ଟଙ୍କା ବ୍ୟୟ ଲାଗି ମଞ୍ଜୁରୀ ମିଳିଛି। ମୋଟ ୩୫୦.୦୪ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ କାର୍ଯ୍ୟକାରୀ ହେବ।

ସେହିପରି ଓଡ଼ିଶା ମିନିଷ୍ଟେରିଆଲ ସର୍ଭିସେସ ରୁଲ ୨୦୨୫କୁ କ୍ୟାବିନେଟ ମଞ୍ଜୁରୀ ମିଳିଛି। ଏହା କମର୍ସିଆଲ ଟ୍ୟାକ୍ସ ଓ ଜିଏସଟି ସଂଗଠନରେ ଜିଲ୍ଲା ମିଲିଷ୍ଟେରିଆଲ କ୍ୟାଡର ପାଇଁ ସ୍ଵତନ୍ତ୍ର ନିଯୁକ୍ତି ପ୍ରଣୟନ କରିବ। ଏହି କ୍ୟାଡରରେ ଜୁନିଅର ଆସିଷ୍ଟାଣ୍ଟଙ୍କଠାରୁ ଏଷ୍ଟାବ୍ଲିସମେଣ୍ଟ ଅଫିସର ପର୍ଯ୍ୟନ୍ତ ବିଭିନ୍ନ ପଦବୀ ରହିବ।

ଓଡ଼ିଶା ନର୍ସିଂ ଏଜୁକେସନ ସଭିସ ରୁଲ ୨୦୨୫କୁ ରାଜ୍ୟ କ୍ୟାବିନେଟର ଅନୁମୋଦନ ମିଳିଛି। ଏହା ନର୍ସିଂ ଶିକ୍ଷାକୁ ସୁଦୃଢ଼ କରିବା ଲାଗି ଟ୍ୟୁଟର ନିଯୁକ୍ତି ଏବଂ ଯୋଗ୍ୟ ଅଧ୍ୟାପକମାନଙ୍କୁ ପଦୋନ୍ନତି ପାଇଁ ନିୟମ ପ୍ରଦାନ କରିବ।

ଏହା ସହ ରାଜ୍ୟ ସଂଗ୍ରହାଳୟଗୁଡ଼ିକର ବ୍ୟବସ୍ଥାପନା ଓ ସମନ୍ଵୟ ପାଇଁ ଏକ ସ୍ଵତନ୍ତ୍ର ସଂଗ୍ରହାଳୟ ନିର୍ଦ୍ଦେଶାଳୟ ଗଠନ ପରେ ଓଡ଼ିଶା ମ୍ୟୁଜିୟମ କ୍ୟୁରେଟୋରିଆଲ ସର୍ଭିସେସ ରୁଲ ପାଇଁ ପ୍ରସ୍ତାବକୁ ଅନୁମୋଦନ ମିଳିଛି